ପାଇଲଟଙ୍କ ସମେତ ୫ ମୃତ
କରାଚୀ, ୧/୯: ସୋମବାର ସକାଳେ ଗିଲଗିଟ-ବାଲ୍ଟିସ୍ତାନର ଡିଆମର ଜିଲ୍ଲାରେ ଏକ ପାକିସ୍ତାନ ସେନା ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ଦୁଇଜଣ ପାଇଲଟ ଏବଂ ତିନି ଜଣ ଟେକ୍ନିସିଆନଙ୍କ ମୃତ୍ୟୁ ହୋଇଛି ବୋଲି ଜଣେ ସରକାରୀ ମୁଖପାତ୍ର କହିଛନ୍ତି।
ସୂଚନା ଅନୁଯାୟୀ, MI-17 ହେଲିକପ୍ଟରଟି ଏକ ନିୟମିତ ତାଲିମ ଉଡ଼ାଣରେ ଥିଲା ବେଳେ ଏଥିରେ ଯାନ୍ତ୍ରିକ ତ୍ରୁଟି ଦେଖା ଦେଇଥିଲା ଏବଂ ସକାଳ ପ୍ରାୟ ୧୦ଟା ସମୟରେ ଖସି ପଡ଼ିଥିଲା।
ଗିଲଗିଟ-ବାଲ୍ଟିସ୍ତାନର ଏକ ପାହାଡିଆ ପର୍ଯ୍ୟଟନ କ୍ଷେତ୍ରରେ ଏହି ଦୁର୍ଘଟଣା ଘଟିଛି। ସେଠାରେ ଏକ ହେଲିପ୍ୟାଡ୍ ପାଇଁ ପରୀକ୍ଷଣ ଅବତରଣ କରାଯାଉଥିଲା। ସରକାରୀ ମୁଖପାତ୍ର ଫୈଜୁଲ୍ଲା ଫାରାକଙ୍କ ସୂଚନା ଅନୁଯାୟୀ, ହେଲିକପ୍ଟରଟିରେ ଏକ ଯାନ୍ତ୍ରିକ ତ୍ରୁଟି ଦେଖାଦେଇଥିଲା ଏବଂ ସେଥିରେ ନିଆଁ ଲାଗିଯାଇଥିଲା।
ସୂଚନାଯୋଗ୍ୟ, ଗତ ମାସରେ ଖାଇବର ପଖତୁନଖ୍ୱା ପ୍ରଦେଶରେ ବନ୍ୟା ରିଲିଫ୍ ସାମଗ୍ରୀ ଯୋଗାଉଥିବା ଏକ ସାମରିକ ହେଲିକପ୍ଟର ଖରାପ ପାଗରେ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ପାଞ୍ଚ ଜଣଙ୍କର ମୃତ୍ୟୁ ହୋଇଥିଲା।
No comments:
Post a Comment