ନୂଆଦିଲ୍ଲୀ, ୬/୯: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପୁଣି ବଡ଼ ବୟାନ। ପ୍ରଧାନମନ୍ତ୍ରୀ ମୋଦିଙ୍କୁ ମହାନ ବୋଲି କହିଛନ୍ତି। ମୋଦିଙ୍କୁ ତାଙ୍କର ବହୁତ ଭଲ ବନ୍ଧୁ ବୋଲି କହିଛନ୍ତି। ଏଥି ସହ ଭାରତ ସହିତ ଆମେରିକାର ସମ୍ପର୍କ ଅତି ସ୍ୱତନ୍ତ୍ର ବୋଲି ମଧ୍ୟ କହିଛନ୍ତି। ଭାରତ ଓ ରୁଷ ଅନ୍ଧକାରମୟ ଚୀନ ପାଖରେ ହଜିଯିବା କହିବାର ଦିନକ ପରେ ଟ୍ରମ୍ପ ଏଭଳି ବୟାନ ଦେଇଛନ୍ତି।
ଟ୍ରମ୍ପ କହିଛନ୍ତି, “ଭାରତ ରୁଷରୁ ବିପୁଳ ପରିମାଣରେ ତେଲ କିଣୁଥିବା ଯୋଗୁଁ ସେ ବହୁତ ନିରାଶ, ଏବଂ ତାଙ୍କ ପ୍ରଶାସନ ପ୍ରତିକ୍ରିୟା ସ୍ବରୂପ ନୂଆଦିଲ୍ଲୀ ଉପରେ ବହୁତ ବଡ଼ ଶୁଳ୍କ ଲାଗୁ କରିଛି। ୫୦ ପ୍ରତିଶତ ଶୁଳ୍କ, ବହୁତ ଉଚ୍ଚ ଶୁଳ୍କ। ମୋଦିଙ୍କ ସହିତ ମୋର ବହୁତ ଭଲ ସମ୍ପର୍କ ଅଛି। ମୋଦି ଜଣେ ମହାନ ପ୍ରଧାନମନ୍ତ୍ରୀ। ଭାରତ ଓ ଆମେରିକା ମଧ୍ୟରେ ଅତି ସ୍ୱତନ୍ତ୍ର ସମ୍ପର୍କ ରହିଛି। ସମ୍ପର୍କ ଥିଲେ ମତଭେଦ ଥାଏ। ମତଭେଦ ସତ୍ତ୍ୱେ ମୁଁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସର୍ବଦା ଭଲ ବନ୍ଧୁ ହୋଇ ରହିବୁ। କିନ୍ତୁ ବର୍ତ୍ତମାନ ସେ ଯାହା କରୁଛନ୍ତି ତାହା ମୋତେ ପସନ୍ଦ ନୁହେଁ। କିନ୍ତୁ ଭାରତ ଏବଂ ଆମେରିକାର ଏକ ଅତ୍ୟନ୍ତ ବିଶେଷ ସମ୍ପର୍କ ଅଛି। ଚିନ୍ତା କରିବାର କିଛି ନାହିଁ।”
ତେବେ ଟ୍ରମ୍ପଙ୍କ ବୟାନକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋସିଆଲ ମିଡ଼ିଆରେ ସମ୍ମାନ ଜଣାଉଥିବା କହି ଅତି ପ୍ରଶଂସା କରିଛନ୍ତି। ମୋଦି କହିଛନ୍ତି, “ଟ୍ରମ୍ପଙ୍କ ଭାବନାକୁ ସମ୍ମାନ ଜଣାଉଛି। ଭାରତ ଓ ଆମେରିକା ମଧ୍ୟରେ ବୁଝାମଣା ମହତ୍ତ୍ୱପୂର୍ଣ୍ଣ। ଦୁଇ ଦେଶ ମଧ୍ୟରେ ଦୂରଦର୍ଶୀ ଓ ବ୍ୟାପକ ବୁଝାମଣା ରହିଛି। ସକରାତ୍ମକ ରଣନୈତିକ ସହଭାଗିତା ରହିଛି। ଉଭୟ ରାଷ୍ଟ୍ର ଆନ୍ତର୍ଜାତୀୟ ସ୍ତରରେ ଏକାଠି କାମ କରିବାକୁ ଆଗ୍ରହୀ। ଟ୍ରମ୍ପଙ୍କ ସକରାତ୍ମକ ମୂଲ୍ୟାୟନ ନେଇ ଧନ୍ୟବାଦ ଜଣାଉଛି।”
ସୂଚନାଯୋଗ୍ୟ, ଚଳିତ ସପ୍ତାହରେ ଚୀନର ତିଆନଜିନରେ ସାଂଘାଇ ସହଯୋଗ ସମ୍ମିଳନୀ ଚାଲିଥିବା ବେଳେ ଏହି ବୈଠକରେ ଯୋଗ ଦେଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଏଠାରେ ରୁଷ ରାଷ୍ଟ୍ରପତି ଭ୍ଲାଦିମର ପୁଟିନ ଓ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ଉତ୍ତମ ବନ୍ଧୁତା ଥିବା ସାରା ବିଶ୍ବକୁ ଜଣାଇଥିଲେ। ହେଲେ, ଶୁକ୍ରବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମୋଦି, ପୁଟିନ ଓ ଜିନପିଙ୍ଗଙ୍କ ଏକ ମିଳିତ ଫଟୋ ସୋସିଆଲ ମିଡିଆରେ ପୋଷ୍ଟ କରି ଭାରତ ଓ ରୁଷ ଅନ୍ଧକାରମୟ ଚୀନ୍ ପାଖରେ ହଜାଇ ଦେଇଥିବା କହିଥିଲେ। ଏବଂ ଏକ ଦୀର୍ଘ ଓ ସମୃଦ୍ଧ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଥିଲେ। ଟ୍ରମ୍ପଙ୍କ ଏହି ପୋଷ୍ଟ ଉପରେ ଭାରତ ପକ୍ଷରୁ କୌଣସି ପ୍ରତିକ୍ରିୟା ଦିଆ ଯାଇନାହିଁ।
No comments:
Post a Comment