କ୍ୟାବିନେଟ୍ ବୈଠକରେ ୬ଟି ବିଭାଗର ୧୦ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମଞ୍ଜୁରୀ
ଭୁବନେଶ୍ୱର (କୋଷ୍ଟାଲ ନ୍ୟୁଜ୍):
ରାଜ୍ୟ ସରକାରଙ୍କ କ୍ୟାବିନେଟ୍ ବୈଠକରେ ୬ଟି ବିଭାଗର ୧୦ଟି ଗୁରୁତ୍ୱପୂର୍ଣ୍ଣ ପ୍ରସ୍ତାବକୁ ମଞ୍ଜୁରୀ ମିଳିଛି। ଏହି ସମ୍ପର୍କରେ ଉନ୍ନୟନ କମିଶନର ଅନୁ ଗାର୍ଗ ସୂଚନା ଦେଇଛନ୍ତି।
୧. OSWAS 3.0 ପ୍ରକଳ୍ପ:
ରାଜ୍ୟ ସରକାରଙ୍କ ଫ୍ଲାଗସିପ୍ ଇ-ଗଭର୍ଣ୍ଣାନ୍ସ ପ୍ରକଳ୍ପ 'ଓସୱାସ ୩.୦' (OSWAS 3.0) କୁ କ୍ୟାବିନେଟ ମଞ୍ଜୁରୀ ପ୍ରଦାନ କରିଛନ୍ତି। ଫାଇଲ୍ କାର୍ଯ୍ୟକୁ ସମ୍ପୂର୍ଣ୍ଣ ଅନଲାଇନ୍ ଓ ପେପରଲେସ୍ କରିବା ପାଇଁ ଏହି ପ୍ରକଳ୍ପକୁ ବ୍ଲକ ସ୍ତର ପର୍ଯ୍ୟନ୍ତ ସମ୍ପ୍ରସାରିତ କରାଯାଉଛି। ₹୧୨୨.୬୦ କୋଟି ଟଙ୍କାର ଏହି ପ୍ରକଳ୍ପକୁ 'TCS' ଦ୍ୱାରା ପରିଚାଳିତ କରାଯିବ। ଏଥିରେ ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ସାମିଲ କରାଯିବା ସହ ବିନା VPN ରେ ମଧ୍ୟ କାର୍ଯ୍ୟ କରିହେବ, ଯାହା ପ୍ରଶାସନିକ ସ୍ୱଚ୍ଛତା ଓ ଉତ୍ତରଦାୟିତ୍ୱ ବୃଦ୍ଧି କରିବ।
୨. ସେମିକଣ୍ଡକ୍ଟର ନୀତିରେ ସଂଶୋଧନ:
କେନ୍ଦ୍ର ସରକାରଙ୍କ ଇଣ୍ଡିଆନ୍ ସେମିକଣ୍ଡକ୍ଟର ମିଶନ (ISM 2.0) ସହ ତାଳଦେଇ ରାଜ୍ୟର ସେମିକଣ୍ଡକ୍ଟର ମ୍ୟାନୁଫ୍ୟାକ୍ଚରିଂ ନୀତିରେ ସଂଶୋଧନ କରାଯାଇଛି। ଏଥିରେ ସେମିକଣ୍ଡକ୍ଟର ଉପକରଣ, କେମିକାଲ୍, ସ୍ପେଶାଲିଟି ଗ୍ୟାସ୍ ଓ ଆଡଭାନ୍ସଡ୍ ମ୍ୟାଟେରିଆଲକୁ ସାମିଲ କରାଯିବା ସହ ଆବଶ୍ୟକୀୟ କ୍ୟାପେକ୍ସ (CapEx) ଉପରେ ୨୫% ଅତିରିକ୍ତ ଆର୍ଥିକ ସହାୟତା ଯୋଗାଇ ଦିଆଯିବ।
୩. ଶକ୍ତି ବିଭାଗ ନୀତି ସଂଶୋଧନ:
ଅକ୍ଷୟ ଶକ୍ତି ନୀତି (Renewable Energy Policy): ରାଜ୍ୟ ଭିତରେ ନେଟ୍ ମିଟରିଂ ଉପଭୋକ୍ତାଙ୍କ ପାଇଁ ବିଦ୍ୟୁତ୍ ଶୁଳ୍କ ଛାଡ଼ (ୟୁନିଟ୍ ପିଛା ୫୦ ପଇସା) କୁ ୧୦ ବର୍ଷ ପାଇଁ ବୃଦ୍ଧି କରାଯାଇଛି। ବ୍ୟାଟେରୀ ଏନର୍ଜି ଷ୍ଟୋରେଜ୍ ପାଇଁ ୨୦ ପଇସା ଛାଡ଼ ମିଳିବ। ପବନ ଶକ୍ତି (Wind Power) ପ୍ରକଳ୍ପ ପାଇଁ ପୂର୍ବରୁ ଥିବା ୫୦୦ ମେଗାୱାଟର କ୍ୟାପିଂ ସୀମା ହଟାଯାଇ ସୋଲାର ପାର୍କ ଭଳି ୱିଣ୍ଡ ପାୱାର ପାର୍କକୁ ପ୍ରୋତ୍ସାହନ ଦିଆଯିବ।
ପମ୍ପଡ୍ ଷ୍ଟୋରେଜ୍ ନୀତି (Pumped Storage Policy): ଦୀର୍ଘମିଆଦୀ ଏନର୍ଜି ଷ୍ଟୋରେଜ୍ ପାଇଁ ନିୟମାବଳୀକୁ ଆହୁରି ସରଳ କରାଯାଇଛି ଏବଂ ପଞ୍ଜୀକରଣ ଅବଧିକୁ ୩ ସପ୍ତାହରୁ ୩ ମାସକୁ ବୃଦ୍ଧି କରାଯାଇଛି।
୪. ଜଳସମ୍ପଦ ବିଭାଗର ବଡ଼ ନିଷ୍ପତ୍ତି:
ପାର୍ବତୀ ଗିରି ମେଗା ଲିଫ୍ଟ ସିଞ୍ଚନ ପ୍ରକଳ୍ପ: ରାଜ୍ୟର ଉଚ୍ଚାଡ଼ ଅଞ୍ଚଳରେ ଜଳସେଚନ ପାଇଁ ₹୧୨,୪୫୮ କୋଟି ଟଙ୍କାର ପ୍ରକଳ୍ପକୁ ମଞ୍ଜୁରୀ ମିଳିଛି। ୨୦୩୧ ମସିହା ପର୍ଯ୍ୟନ୍ତ ଚାଲିବାକୁ ଥିବା ଏହି ଯୋଜନାରେ ୧୬୧ଟି ମେଗା ଲିଫ୍ଟ ପ୍ରକଳ୍ପ ମାଧ୍ୟମରେ ୨.୬୨ ଲକ୍ଷ ହେକ୍ଟର ଜମି ଜଳସେଚିତ ହେବ, ଯାହାଦ୍ୱାରା ୭ ଲକ୍ଷ ଚାଷୀ ଉପକୃତ ହେବେ।
କ୍ଷୁଦ୍ର ଜଳସେଚନ ଓ ପୋଖରୀର ପୁନରୁଦ୍ଧାର: ₹୩୮୯ କୋଟି ଟଙ୍କାରେ ୫୧୫ଟି ନୂଆ କ୍ଷୁଦ୍ର ଜଳସେଚନ ପ୍ରକଳ୍ପ (MIP) ଓ ୧୬୫ଟି ଅସମ୍ପୂର୍ଣ୍ଣ କାର୍ଯ୍ୟ ଶେଷ କରାଯାଇ ୧୫,୭୦୦ ହେକ୍ଟର ଜମିର ଜଳସେଚନ କ୍ଷମତା ପୁନରୁଦ୍ଧାର କରାଯିବ।
୫. ମହିଳା ଓ ଶିଶୁ ବିକାଶ ବିଭାଗ:
ଯଶୋଦା ଓ ଆଶୀର୍ବାଦ ଯୋଜନା: ଅନାଥ, ଗୁରୁତର ରୋଗାକ୍ରାନ୍ତ ବା କୋଭିଡରେ ଅଭିଭାବକ ହରାଇଥିବା ଶିଶୁଙ୍କ ପାଠପଢ଼ା, ବୃତ୍ତି ଓ ସାମାଜିକ ସୁରକ୍ଷା ପାଇଁ ଏହି ଯୋଜନାକୁ ₹୨୯୬.୯୯ କୋଟି ବ୍ୟୟବରାଦ ସହ ଆଗାମୀ ୫ ବର୍ଷ ପାଇଁ ସମ୍ପ୍ରସାରିତ କରାଯାଇଛି।
ମାଳତୀ ଦେବୀ ପ୍ରାକ୍ ବିଦ୍ୟାଳୟ ପରିଧାନ ଯୋଜନା: ଅଙ୍ଗନବାଡ଼ିର ୩ରୁ ୬ ବର୍ଷର ଶିଶୁଙ୍କୁ ମାଗଣାରେ ୨ ଜୋଡ଼ା ୟୁନିଫର୍ମ, ୨ ଯୋଡ଼ା ମୋଜା, ୧ ଯୋଡ଼ା ଜୋତା ଓ ୧ଟି ସ୍ୱେଟର ଯୋଗାଇ ଦେବା ପାଇଁ ₹୫୮୬ କୋଟି ଟଙ୍କା ମଞ୍ଜୁର ହୋଇଛି। ଏହାଦ୍ୱାରା ୧୪.୭୬ ଲକ୍ଷ ଶିଶୁ ଉପକୃତ ହେବେ।
୬. ବେସାମରିକ ସେବା ପୁନର୍ବାସ ସହାୟତା ନିୟମାବଳୀ (୨୦୨୬):
ସରକାରୀ କର୍ମଚାରୀଙ୍କ ଅସମୟରେ ବିୟୋଗ ହେଲେ ସେମାନଙ୍କ ପରିବାରବର୍ଗଙ୍କୁ ଅନୁକମ୍ପାମୂଳକ ନିଯୁକ୍ତି ଦେବା ପ୍ରକ୍ରିୟାକୁ ଅଧିକ ସରଳ କରାଯାଇଛି। ପୂର୍ବରୁ ଥିବା ୧୦୦-ପଏଣ୍ଟ ମୂଲ୍ୟାୟନ ବ୍ୟବସ୍ଥା ଓ ଗ୍ରୁପ୍-ଡି ପଦବୀ ପାଇଁ ଥିବା ୫୦% କ୍ୟାପିଂ ସୀମାକୁ ଉଚ୍ଛେଦ କରାଯାଇଛି।
