ଆନ୍ଧ୍ରର ଏକ ପଥର ଖଣି ବିସ୍ଫୋରଣରେ ୬ ଓଡ଼ିଆଙ୍କ ମୃତ୍ୟୁ ସୂଚନା। ବପଟ୍ଲା ଜିଲ୍ଲାର ବଲିକୁରଭା ଗ୍ରାନାଇଟ୍ ପଥର ଖଣିରେ ମୃତ।
୧୦ ଜଣ ଶ୍ରମିକ ଗୁରୁତର
ଅମରାବତୀ, ୩/୮: ଆଜି ପଡ଼ୋଶୀ ଆନ୍ଧ୍ରପ୍ରଦେଶର ବପଟ୍ଲା ଜିଲ୍ଲାରେ ବଲିକୁରଭା ଗ୍ରାନାଇଟ୍ ପଥର ଖଣିରେ ଖଣି ବିସ୍ଫୋରଣ ହେବା ଫଳରେ ଓଡ଼ିଶାରୁ ଅତି କମରେ ଛଅ ଜଣ ପ୍ରବାସୀ ଶ୍ରମିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।
ରିପୋର୍ଟ ଅନୁଯାୟୀ, ପଥର ଖଣି ବିସ୍ଫୋରଣ ହେବା ସମୟରେ ପ୍ରାୟ ୨୦ ଜଣ ଶ୍ରମିକ ଘରୋଇ ଗ୍ରାନାଇଟ୍ ଖଣିରେ କାମ କରୁଥିଲେ। ସୂଚନା ପାଇ ସ୍ଥାନୀୟ ପ୍ରଶାସନର ବରିଷ୍ଠ ଅଧିକାରୀମାନେ ଘଟଣାସ୍ଥଳକୁ ଯାଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ।
ଦୁର୍ଘଟଣା ଯୋଗୁଁ ଅତି କମରେ ୬ ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୧୦ ଜଣ ଗୁରୁତର ଆହତ ହୋଇଛନ୍ତି ବୋଲି ରିପୋର୍ଟରେ କୁହାଯାଇଛି। ଆହତ ଶ୍ରମିକମାନଙ୍କୁ ନିକଟସ୍ଥ ଡାକ୍ତରଖାନାକୁ ପଠାଯାଇଛି। ପଥର ତଳେ ଫସି ରହିଥିବା କିଛି ଶ୍ରମିକଙ୍କୁ ଉଦ୍ଧାର କରିବା ପାଇଁ ପ୍ରୟାସ ଚାଲିଛି।
ସୂଚନା ଅନୁଯାୟୀ, ମୃତ ୬ ଜଣ ପ୍ରବାସୀ ଶ୍ରମିକଙ୍କ ମଧ୍ୟରୁ ଦୁଇଜଣ ଗଜପତି ଜିଲ୍ଲାର ମୋହନା ଅଞ୍ଚଳର ବାସିନ୍ଦା। ମୃତକଙ୍କ ନାମ ଭାସ୍କର ବିସୋଇ ଏବଂ ଟୁକୁନା ଦଳେଇ। ଏହି ଦୁଇଜଣ ଗଜପତିର ମୋହନା ଅଞ୍ଚଳର ଆଲୋରା ଗାଁର ଥିଲେ। ବାକି ଚାରି ମୃତ ଶ୍ରମିକଙ୍କ ପରିଚୟ ଏପର୍ଯ୍ୟନ୍ତ ଜଣାପଡ଼ିନାହିଁ। ତେବେ ସେମାନେ ଗଞ୍ଜାମ ଜିଲ୍ଲାର ବୋଲି ଦାବି କରାଯାଇଛି।
ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁ ଗ୍ରାନାଇଟ୍ ଖଣିରେ ହୋଇଥିବା ଦୁର୍ଘଟଣାରେ ଅତ୍ୟନ୍ତ ଦୁଃଖ ପ୍ରକାଶ କରିଛନ୍ତି। ସେ ବରିଷ୍ଠ ଅଧିକାରୀଙ୍କ ସହ କଥା ହୋଇ ଆହତଙ୍କ ପାଇଁ ସର୍ବୋତ୍ତମ ଚିକିତ୍ସା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛନ୍ତି।
No comments:
Post a Comment