COASTAL NEWS ODIA 1314
ଶିମିଳିପାଳ ପୋଲିସର ସର୍ଚ୍ଚ ଅପରେସନ୍ ବେଳେ ଜବତ ହୋଇଛି ୭୧ଟି ଦେଶୀ ବନ୍ଧୁକ
ଶିମିଳିପାଳ - (CNO) ଭଞ୍ଜ ବିହାରୀ ମହାନ୍ତି - ଶିମିଳିପାଳ ଅଭୟାରଣ୍ୟ ନିକଟବର୍ତୀ ଅଂଚଳରୁ ପୁଣି ଜବତ ହେଲା ଦେଶୀ ବନ୍ଧୁକ । ଶିମିଳିପାଳ ପୋଲିସର ସର୍ଚ୍ଚ ଅପରେସନ୍ ବେଳେ ୭୧ଟି ଦେଶୀ ବନ୍ଧୁକ ଜବତ ହୋଇଛି । ଦ୍ୱିତୀୟ ପର୍ଯ୍ୟାୟ ସର୍ଚ୍ଚ ଅପରେସନ୍ ଜାରି ରହିଥିବାବେଳେ ଏତେ ପରିମାଣର ବନ୍ଧୁକ ଜବତ ହୋଇଥିବା ସୂଚନା ଦେଇଛି ଶିମିଳିପାଳ ପୋଲିସ ।
ଶିମିଳିପାଳ ସଂଲଗ୍ନ ୯ଟି ଥାନା ଅଧିନରେ ଥିବା ଗାଁ ଗୁଡିକରେ ସର୍ଚ୍ଚ ଅପରେସନ୍ କରି ୭୧ଟି ଦେଶୀ ବନ୍ଧୁକ ଜବତ କରାଯାଇଛି । ଏହାକୁ ନେଇ ସାମ୍ବାଦିକ ସମ୍ମିଳନୀରେ ଅଧିକ ସୂଚନା ପ୍ରଦାନ କରାଯିବ ।
ଶିକାରୀ ଆକ୍ରମଣରେ ୨ ବନ କର୍ମଚାରୀ ସହିଦ ହେବା ପରେ ଆକ୍ସନ୍ ମୋଡରେ ଆସି ଯାଇଛି ଶିମିଳିପାଳ ପୋଲିସ । ଜୁନ୍ ୧୮ ତାରିଖରୁ ଅଭୟାରଣ୍ୟକୁ ଶିକାର ଓ ଶିକାରୀ ମୁକ୍ତ କରିବା ପାଇଁ ଚାଲିଛି ତଲାସୀ ଅଭିଯାନ । ୪ ପ୍ଲାଟୁନ୍ ପୋଲିସ ଫୋର୍ସ ସହ ଥାନା କର୍ମଚାରୀ ଏହି ସର୍ଚ୍ଚ ଅପରେସନରେ ସାମିଲ ହୋଇଥିଲେ । ଏହି ସମୟ ଭିତରେ ୪୦ଟି ମାମଲା ରୁଜୁ ହେବା ସହ ବର୍ତମାନ ସୁଦ୍ଧା ୧୬୫ଟି ବନ୍ଧୁକ, ଗୁଳି ଜବତ ହୋଇଛି ।
ଗୋଟିଏ ବନ୍ଧୁକ ତିଆରି କାରଖାନାକୁ ସିଜ୍ କରିଛି ପୋଲିସ । ଏହାସହ ବଜ୍ରକାପ୍ତା ଛାଲ, ନଗଦ ୨ଲକ୍ଷ ୯୫ ହଜାର ଟଙ୍କା, ମୋବାଇଲ ଫୋନ୍, ବନ୍ୟପ୍ରାଣୀ ମୃତଦେହ, ମାଂସ ଆଦି ଜବତ କରାଯାଇଛି । ୨୧ ଜଣ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ ମଧ୍ୟ କରାଯାଇଛି ।
No comments:
Post a Comment