କୃଷକ ଉତ୍ପାଦକ କମ୍ପାନୀ ମାଧ୍ୟମରେ ଓଡ଼ିଶାରେ ଦୁଗ୍ଧ ବିକାଶ

ଶିରୋନାମା: କୃଷକ ଉତ୍ପାଦକ କମ୍ପାନୀ ମାଧ୍ୟମରେ ଓଡ଼ିଶାରେ ଦୁଗ୍ଧ ବିକାଶ— ଓଡ଼ିଶା କୃଷି ଓ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ ରେ ରାଜ୍ୟସ୍ତରୀୟ ସମନ୍ବୟ ସମ୍ମିଳନୀ 

ଭୁବନେଶ୍ୱର: ଓଡ଼ିଶାର ଗ୍ରାମୀଣ ଅର୍ଥନୀତିକୁ ସୁଦୃଢ଼ କରିବା, ଚାଷୀଙ୍କ ନିଶ୍ଚିତ ଆୟକୁ ସୁନିଶ୍ଚିତ କରିବା ଏବଂ ଦୁଗ୍ଧ ଉତ୍ପାଦନକୁ ଉଦ୍ୟମୀକରଣ ମାଧ୍ୟମରେ ନୂଆ ଦିଗକୁ ଆଣିବା ପାଇଁ ଆଜି ଓଡ଼ିଶା କୃଷି ଓ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ (OUAT) ପରିସରରେ “କୃଷକ ଉତ୍ପାଦକ କମ୍ପାନୀ ବିକାଶ ମାଧ୍ୟମରେ ଓଡ଼ିଶାରେ ଦୁଗ୍ଧ ବିକାଶର ରଣନୀତିକରଣ” ବିଷୟକ ରାଜ୍ୟସ୍ତରୀୟ ସମନ୍ବୟ ସମ୍ମିଳନ ଆୟୋଜିତ ହେଲା।

ଏହି ସଭାରେ ସରକାରୀ ବିଭାଗ, ଅର୍ଥ ସଂସ୍ଥା, ବେସରକାରୀ କମ୍ପାନୀ, ଶିକ୍ଷାବିଦ୍, ଗବେଷକ ଏବଂ କୃଷକ ଉତ୍ପାଦକ ସଂଗଠନ କୃଷକ ଉତ୍ପାଦକ କମ୍ପାନୀ  ପ୍ରତିନିଧିମାନେ ଗୋପାଳନ ଉଦ୍ୟମକୁ କିପରି ଆର୍ଥିକ ଭାବେ ଶକ୍ତିଶାଳୀ କରି ପାରିବ, ସେଥିରେ ଚର୍ଚ୍ଚା କଲେ।

ସମ୍ମିଳନୀରେ ଉଲ୍ଲେଖ ହେଲା ଯେ ଗୋପାଳନ କେବଳ ଦୁଧ ବିକ୍ରୟ ନୁହେଁ; ଏହା ଲକ୍ଷାଧିକ ପରିବାରଙ୍କ ପାଇଁ ଦୈନିକ ଆୟ ଓ ଗ୍ରାମିଣ ଅର୍ଥନୀତିର ସ୍ଥମ୍ଭ। ମୌସୁମୀ କୃଷି ଉପରେ ନିର୍ଭର ଓଡ଼ିଶାରେ ଗୋପାଳନ ହେଉଛି ନିର୍ବିକଳ୍ପ ଆୟର ସ୍ଥିର ମାଧ୍ୟମ।

ଓଡ଼ିଶା କୃଷି ଓ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟର ଉପକୁଳପତି ପ୍ରଫେସର ପ୍ରଭାତ କୁମାର ରାଉଳ ନୋମାଡିକ ଆଗ୍ରିକଲ୍ଚର, ସ୍ମାର୍ଟ ଡେରି ଫାର୍ମିଂ, ଗୋ-ଆଧାର କାର୍ଡ (Cattle ID) ଏବଂ ଦେଶୀ ଗୋ-ଉତ୍ପାଦର GI Tagging ଜି ଆଇ ଟ୍ୟାଗ ଭଳି ନୂତନ ମଡେଲ୍ ଗ୍ରହଣ କରିବା ପାଇଁ ଆହ୍ୱାନ କଲେ।

ଦେଶୀ ପ୍ରଜାତିର ଗୋ ବଂଶ ସୁରକ୍ଷା ପାଇଁ ଗବେଷଣା କରୁଥିବା ପ୍ରଫେସର ଏସ୍ କେ ଦାସ ବିଞ୍ଝାରପୁରୀ ଗାଈ ର ବିକାଶ ସଂରକ୍ଷଣ ପାଇଁ ଓ ଟ୍ରାକ୍ଟର ପାୱାର ଟିଲର୍ସ ପରି ବଳଦ କିଣିବା ବେଳେ ସରକାରୀ ସହାୟତା ଲୋଡିଥିଲେ l

ଡକ୍ଟର ଶ୍ରାବଣୀ ଦାସ ଦେଶୀ ଗାଈ ଦୁଗ୍ଧଜାତ ସମାଗ୍ରୀ ର ବିକ୍ରୟ ପାଇଁ ଓ ସବୁଜ ଘାସ ସ୍ରୁଷ୍ଟି କରିବା ଉପରେ ଗୁରୁତ୍ଵ ଦେଇଥିଲେ l

ବୌଦ୍ଧ ଜିଲ୍ଲା ସାଲୁଙ୍କି ଏଫ୍ ପି ଓ ର ସି ଇ ଓ କୃତିବାସ ପଲିଆ ଗୋଚର ଜମିକୁ ସରକାର ଘାସ ଚାଷ ପାଇଁ ଲିଜ୍ ଦେବାକୁ ପ୍ରସ୍ତାବ ରଖିଥିଲେ l

ଆଳି ଆଗ୍ରୋ ପ୍ରଡ୍ୟୁସର କମ୍ପାନୀ ଲିମିଟେଡ ର ପରିଚାଳନା ନିର୍ଦ୍ଦେଶକ ଜଗନ୍ନାଥ ମହାନ୍ତି ବିଞ୍ଝାରପୁରୀ ଗାଈର କ୍ଷୀର ସଂଗ୍ରହ ତଥା ପ୍ରକ୍ରିୟାକରଣ ତଥା ଓ ଇଉ ଏ ଟି ର ପ୍ରସ୍ତୁତ ଦାନା ବିତରଣ, ଗୋବଂଶର ବୃଦ୍ଧି ଓ ବ୍ୟବସାୟୀ କରଣ ପାଇଁ ଫାର୍ମର ପ୍ରଡ୍ୟୁସର କମ୍ପାନୀ ମାନଙ୍କୁ ସରକାରୀ ପ୍ରୋତ୍ସାହନ ଦେବାକୁ ପ୍ରସ୍ତାବ ରଖିଥିଲେ l

ସ୍ୱାବଲମ୍ବୀ ଭାରତ ଅଭିଯାନର ପୂର୍ବ ଜୋନ କୋଅର୍ଡିନେଟର ଶ୍ରୀ ସାରଦା ସତପଥୀ ଦେଶୀ ଗୋବଂଶ ସୁରକ୍ଷା, A2 ଦୁଧର ବ୍ରାଣ୍ଡିଂ ଓ ଗୋବର ଏବଂ ଗୋମୂତ୍ର ଉଦ୍ୟୋଗ ମାଧ୍ୟମରେ ଯୁବମାନଙ୍କ ପାଇଁ ରୋଜଗାର ସୃଷ୍ଟିର ଆବଶ୍ୟକତା ଉପସ୍ଥାପନ କଲେ।

ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ପକ୍ଷରୁ ଶ୍ରୀ ବାଦଲ କୁମାର ମହାନ୍ତି କହିଲେ ଯେ 2047 ସୁଦ୍ଧା ଓଡ଼ିଶା ପ୍ରତିଦିନ 6000 ମେଟ୍ରିକ୍ ଟନ ଦୁଧ ଉତ୍ପାଦନ ଲକ୍ଷ୍ୟ ନେଇ ଆଗୁଆଁ ଚାଲିଛି। ଆମୁଲ୍ ମଡେଲ୍ ଭଳି “ନୂଆ ଆନନ୍ଦ ମୋଡେଲ୍” ଅନୁସରଣ କରି ରାଜ୍ୟକୁ ଦୁଗ୍ଧ କ୍ଷେତ୍ରରେ ଶକ୍ତିକେନ୍ଦ୍ର କରି ତୋଳିବା ଲକ୍ଷ୍ୟ ନିର୍ଦ୍ଧାରିତ।

ବିଶେଷଜ୍ଞମାନେ ଦେଶୀ ଘିଅ, ପନୀର, ଛେନା ଇତ୍ୟାଦିକୁ ଜାତୀୟ ଓ ଆନ୍ତର୍ଜାତୀୟ ବଜାରରେ ସ୍ଥାନ ଦେବା, ଯୁବ ଉଦ୍ୟମୀଙ୍କୁ ଲୋନ୍-ସବସିଡି ଏବଂ କୃଷକ ଉତ୍ପାଦକ କମ୍ପାନୀ ମାନଙ୍କୁ ଦୁଗ୍ଧଜାତ ଦ୍ରବ୍ଯ ପ୍ରସ୍ତୁତିକରଣ ଯନ୍ତ୍ରପାତି ପାଇଁ ସହାୟତା ଦେବାର ଆବଶ୍ୟକତା ଉଠାଇଲେ। ଏହାସହିତ ଦେଶୀ ଦୁଧ ପାଇଁ MSP, ଏମ୍ ଏସ୍ ପି ଦେଶୀ ଗୋ ବଂଶ ପାଇଁ ଭତ୍ତା, ଡିଜିଟାଲ୍ ଟିକାକରଣ ପ୍ରଣାଳୀ ଓ ସବୁଜ ଘାସ ଚାଷ ବିକାଶର ପ୍ରସ୍ତାବ ମଧ୍ୟ କୃଷକ ସଂଗଠନ ପକ୍ଷରୁ ଉପସ୍ଥାପିତ କରାଗଲା ।

ସଭାର ଶେଷ ସନ୍ଦେଶ ଥିଲା—

“କୃଷକ ଉତ୍ପାଦକ ସଂଗଠନ ମାଧ୍ୟମରେ ଦେଶୀ ଗୋ ବଂଶ ଆଧାରିତ ଦୁଗ୍ଧ ଉତ୍ପାଦନ ଓ ଗୋପାଳନ ବିକାଶ—ଓଡ଼ିଶାର ଉନ୍ନତିର ନୂଆ ଦିଗ।”

ସରକାର-ବେସରକାରୀ ସଂସ୍ଥାମାନଙ୍କ ମଧ୍ୟରେ ସହଯୋଗ, ଓଡ଼ିଶା କୃଷି ଓ ପ୍ରଯୁକ୍ତିବିଦ୍ୟା ବିଶ୍ୱବିଦ୍ୟାଳୟ (OUAT ଭଳି ଶିକ୍ଷାନୁଷ୍ଠାନଙ୍କ ଗବେଷଣା ଜ୍ଞାନ, ନାବାର୍ଡ-ନାଫେଡ୍-ଏପିକଲ୍ ଭଳି ସଂସ୍ଥାମାନଙ୍କ ଅର୍ଥ ଓ ବଜାର ସହାୟତା ଓ କୃଷକ ଉତ୍ପାଦକ ସଂଗଠନ ମାନଙ୍କ ତଳସ୍ତରୀୟ ଯୋଜନା ମିଶିଲେ ଓଡ଼ିଶା ଆଗାମୀ ବର୍ଷ ମଧ୍ୟରେ ଦେଶର ଗୋପାଳନ ଓ ଦୁଗ୍ଧ ଉତ୍ପାଦନ ନୀତିର ଇତିହାସ ପୁନଃଲେଖନ କରିପାରିବ।

ସମ୍ମିଳନ ଏକ ନୂଆ ବାଣୀ ଦେଇ ଶେଷ ହେଲା—

“ଦେଶୀ ଗୋ ବଂଶ , ଦେଶୀ ଦୁଧ ଓ ଦେଶୀ ଉଦ୍ୟମ — ଓଡ଼ିଶାର ଗୋପାଳନ ଓ ଦୁଗ୍ଧ ଉତ୍ପାଦନ ଉନ୍ନତିର ତ୍ରିମୂର୍ତ୍ତି।”