COASTAL NEWS Odia 911
ଯୁବକକୁ ମାରି ନଦୀ ପଠାରେ ଫିଙ୍ଗିଦେଲେ
ଦଶରଥପୁର - ଦଶରଥପୁର ଥାନା ମଲ୍ଲିକାପୁର ପଞ୍ଚାୟତ କାଣୀନଦୀପଠା ବାଉଁଶବାଡ଼ି ନିକଟରୁ ଜଣେ ଯୁବକଙ୍କ ମୃତଦେହ ଜବତ କରାଯାଇଛି। ମୃତକ ହେଲେ ମହାନ୍ତିପାଟଣା ଗ୍ରାମର ଚିତ୍ତରଂଜନ ନାୟକଙ୍କ ବଡ଼ପୁଅ ସବ୍ୟସାଚୀ(୨୫)। ତାଙ୍କୁ କେହି ହତ୍ୟାକରି ସେଠାରେ ଫିଙ୍ଗି ଦେଇଥିବା ତାଙ୍କ ମା’ ସ୍ନେହଲତା ନାୟକ ଦଶରଥପୁର ଥାନାରେ ଅଭିଯୋଗ କରିଛନ୍ତି। ଅଭିଯୋଗ ମୁତାବକ, ସବ୍ୟସାଚୀ ବେଙ୍ଗାଲୁରୁରେ ଏକ ଘରୋଇ ସଂସ୍ଥାରେ କାମ କରୁଥିଲେ। ୨୪ ତାରିଖରେ ସେ ବେଙ୍ଗାଲୁରୁରୁ ଘରକୁ ଆସିଥିଲେ।
୨୫ ତାରିଖ ସକାଳେ ମାଆଙ୍କ ପାଇଁ ଜଳଖିଆ ଆଣିବାକୁ ବଜାରକୁ ଯାଇଥିଲେ। ବହୁ ସମୟ ପର୍ଯ୍ୟନ୍ତ ଘରକୁ ନଫେରିବାରୁ ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ମାତ୍ର ତାଙ୍କର କୌଣସି ପତ୍ତା ମିଳି ନଥିଲା। ଆଜି ପୂର୍ବାହ୍ନ ପ୍ରାୟ ୧୦ ଟା ବେଳେ ପୁଅର ମୃତଦେହ କାଣୀନଦୀ ପଠା ବାଉଁଠବାଡ଼ି ନିକଟରେ ପଡ଼ିଥିବା ଖବର ପାଇ ପରିବାର ଲୋକେ ଘଟଣାସ୍ଥଳରେ ପହଞ୍ଚିଥିଲେ। ଶରୀରର ଏକାଧିକ ସ୍ଥାନରେ କ୍ଷତଚିହ୍ନ ଥିବାରୁ ପୁଅକୁ କେହି ହତ୍ୟା କରି ଫିଙ୍ଗି ଦେଇଥିବା କଥା ସବ୍ୟସାଚୀ ର ମା’ ପ୍ରକାଶ କରିଛନ୍ତି । ଦଶରଥପୁର ଥାନା ପୁଲିସ କେସ୍ ନମ୍ବର ୧୬୯/୨୩ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛନ୍ତି ।
No comments:
Post a Comment