त्रिदलं त्रिगुणाकारं त्रिनेत्रं च त्रियायुधम् ।
त्रिजन्म पापसंहारं एकबिल्वं शिवार्पणम् ॥ १ ॥
त्रिशाखैः बिल्वपत्रैश्च ह्यच्छिद्रैः कोमलैः शुभैः ।
शिवपूजां करिष्यामि एकबिल्वं शिवार्पणम् ॥ २ ॥
अखण्ड बिल्वपत्रेण पूजिते नन्दिकेश्वरे ।
शुद्ध्यन्ति सर्वपापेभ्यो एकबिल्वं शिवार्पणम् ॥ ३ ॥
शालिग्राम शिलैकं च विप्राणां जातु च द्विजैः ।
अग्निकोटि सहस्राणि एकबिल्वं शिवार्पणम् ॥ ४ ॥
दन्तिकोटि सहस्रेषु अश्वमेध शतानि च ।
कोटिकन्या महादानं एकबिल्वं शिवार्पणम् ॥ ५ ॥
काशीक्षेत्रे निवासं च कालभैरव दर्शनम् ।
प्रयागे माधवं दृष्ट्वा एकबिल्वं शिवार्पणम् ॥ ६ ॥
इन्द्रादि देववृन्दैश्च पूजितं परमेश्वरम् ।
लिङ्गरूपं महादेवं एकबिल्वं शिवार्पणम् ॥ ७ ॥
सर्वरोग विनाशं च सर्वसंपत्करं शुभम् ।
सर्वलोकैकनाथं च एकबिल्वं शिवार्पणम् ॥ ८ ॥
॥ फलश्रुति ॥
बिल्वाष्टकमिदं पुण्यं यः पठेत् शिवसन्निधौ ।
सर्वपाप विनिर्मुक्तः शिवलोकं स गच्छति ॥
No comments:
Post a Comment