ପାକିସ୍ତାନ ଆତଙ୍କୀ ଆଡ୍ଡା ଉପରେ ଏୟାର ଷ୍ଟ୍ରାଇକ
୮ ଜଣ ମୃତ: ପାକ୍ ଅଧିକାରୀ
ନୂଆଦିଲ୍ଲୀ, ୦୭/୦୫: ଆତଙ୍କବାଦୀ ସଂଗଠନ ଲସ୍କର-ଇ-ତୋଏବା ଓ ଜୈଶ-ଏ-ମହମ୍ମଦର ଗଡ଼ ମୁରିଦକେ ଓ ବାହାଓ୍ଵାଲପୁର ସମେତ ପାକିସ୍ତାନ ଅଧିକୃତ କଶ୍ମୀରରେ ଥିବା ୯ଟି ଆତଙ୍କୀ ଶିବିର ଉପରେ ଭାରତୀୟ ସଶସ୍ତ୍ର ବାହିନୀ ବୁଧବାର କ୍ଷେପଣାସ୍ତ୍ର ଆକ୍ରମଣ କରିଛି।
ଏପ୍ରିଲ ୨୨ ରେ ଜମ୍ମୁ-କଶ୍ମୀରର ଅନନ୍ତନାଗ ଜିଲ୍ଲାର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣର ଜବାବରେ ରାତି ୧ଟା ୪୪ମିନିଟରେ ଏହି ଆକ୍ରମଣ କରାଯାଇଛି। ଏହି ଅପରେସନର ନାମ ‘ଅପରେସନ ସିନ୍ଦୁର’ ରଖାଯାଇଛି।
ପ୍ରତିରକ୍ଷା ମନ୍ତ୍ରଣାଳୟ ଏକ ସରକାରୀ ବିବୃତ୍ତିରେ ପାକିସ୍ତାନ ଏବଂ ପାକିସ୍ତାନ ଅଧିକୃତ ଜମ୍ମୁ-କଶ୍ମୀରରେ ଆତଙ୍କବାଦୀ ଭିତ୍ତିଭୂମି ଉପରେ ଆକ୍ରମଣ କରିବାକୁ ନିଶ୍ଚିତ କରିଛି , ଯେଉଁଠାରୁ ଭାରତ ବିରୋଧରେ ଆତଙ୍କବାଦୀ ଆକ୍ରମଣ ପାଇଁ ଯୋଜନା କରାଯାଇଛି।
ଏୟାର ଷ୍ଟ୍ରାଇକ ଯୋଗୁଁ ଧର୍ମଶାଳା, ଜମ୍ମୁ, ଶ୍ରୀନଗର, ଲେହ, ଯୋଧପୁର, ଭୁଜ ଏବଂ ଅମୃତସରକୁ ବିମାନ ଚଳାଚଳ ବାଧାପ୍ରାପ୍ତ ହୋଇଥିବା ବେଳେ ଏୟାର ଇଣ୍ଡିଆ, ଇଣ୍ଡିଗୋ, ସ୍ପାଇସ୍ ଜେଟ୍, ଆକାଶ ଏୟାର ଏବଂ ଏୟାର ଇଣ୍ଡିଆ ଏକ୍ସପ୍ରେସ ସମେତ ପ୍ରମୁଖ ବିମାନ ଚଳାଚଳ ବନ୍ଦ ରହିଛି।
ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏୟାର ଇଣ୍ଡିଆ କହିଛି ଯେ ଜମ୍ମୁ, ଶ୍ରୀନଗର, ଲେହ, ଯୋଧପୁର, ଅମୃତସର, ଭୁଜ, ଜାମନଗର, ଚଣ୍ଡିଗଡ଼ ଏବଂ ରାଜକୋଟରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ସମସ୍ତ ବିମାନ ଉଡ଼ାଣ ବାତିଲ କରାଯାଇଛି।
ସେହିପରି ଇଣ୍ଡିଗୋ ପକ୍ଷରୁ କୁହାଯାଇଛି ଯେ, ଶ୍ରୀନଗର, ଜମ୍ମୁ, ଅମୃତସର, ଲେହ, ଚଣ୍ଡିଗଡ଼, ବିକାନେର, ଯୋଧପୁର ଏବଂ ଧର୍ମଶାଳାକୁ ଆସୁଥିବା ଏହାର ସମସ୍ତ ବିମାନକୁ ଆଜି ପାଇଁ ବାତିଲ କରାଯାଇଛି। ଅନ୍ୟପଟେ ଜମ୍ମୁ, କାଠୁଆରେ ସବୁ ଶିକ୍ଷାନୁଷ୍ଠାନ ବନ୍ଦ। ସାମ୍ବା, ରାଜୌରୀ, ପୁଞ୍ଚେରେ ମଧ୍ୟ ସବୁ ଶିକ୍ଷାନୁଷ୍ଠାନ ବନ୍ଦ ରହିଛି।
ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଆତଙ୍କବାଦ ପ୍ରତି ବିଶ୍ୱ ଶୂନ୍ୟ ସହନଶୀଳତା ପ୍ରଦର୍ଶନ କରିବା ଉଚିତ ବୋଲି ଏକ ପୋଷ୍ଟରେ କହିଛନ୍ତି।
ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ, ଆମେ ପାକିସ୍ତାନର କୌଣସି ସାମରିକ ପ୍ରତିଷ୍ଠାନକୁ ଟାର୍ଗେଟ କରାଯାଇନାହିଁ। ଲକ୍ଷ୍ୟ ଚୟନ ଏବଂ କାର୍ଯ୍ୟକାରିତା ପଦ୍ଧତିରେ ଭାରତ ଯଥେଷ୍ଟ ସଂଯମତା ପ୍ରଦର୍ଶନ କରିଛି। ଏହି ଆକ୍ରମଣ ପାଇଁ ଯେଉଁମାନେ ଦାୟୀ ସେମାନଙ୍କୁ ଦାୟୀ କରାଯିବ ବୋଲି ଭାରତ ପ୍ରତିଶ୍ରୁତି ପାଳନ କରୁଛି।
ପ୍ରତିକୂଳ ଆକ୍ରମଣ ହେଲେ ପ୍ରଭାବଶାଳୀ ବେସାମରିକ ସୁରକ୍ଷା ପାଇଁ ସମଗ୍ର ଦେଶରେ ପ୍ରତିରକ୍ଷା ସୁରକ୍ଷା ମକ୍ ଡ୍ରିଲ୍ ର କିଛି ଘଣ୍ଟା ପୂର୍ବରୁ ଭାରତ ଏହି ଆକ୍ରମଣ କରିଛି।
ଆକ୍ରମଣରେ ପାକର ୮ ଜଣଙ୍କ ମୃତ୍ୟୁ ହୋଇଥିବା ପାକ୍ ଅଧିକାରୀ କହିଛନ୍ତି।
No comments:
Post a Comment