ଅଟାରି-ୱାଘା ସୀମା ଦେଇ ଭାରତ ଛାଡିଲେ ୨୭୨ ପାକିସ୍ତାନୀ ନାଗରିକ

ମହାରାଷ୍ଟ୍ରରେ ରହୁଛନ୍ତି ସର୍ବାଧିକ ୫୦୫୦ ପାକିସ୍ତାନୀ ନାଗରିକ।

ପାକିସ୍ତାନ ଛାଡ଼ିଲେ ୬୨୯ ଭାରତୀୟ

ନୂଆଦିଲ୍ଲୀ, ୨୭/୦୪: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ସରକାର ଦେଶରେ ଥିବା ସବୁ ପାକିସ୍ତାନୀ ନାଗରିକଙ୍କୁ ଦେଶ ଛାଡି ଯିବା ପାଇଁ ନିର୍ଦ୍ଦେଶ ଦେଇଥିଲେ। ଏଥିପାଇଁ ୨୭ ତାରିଖ ଡେଡ୍ ଲାଇନ ଦେଇଥିଲେ। ଭାରତ ସରକାର ପାକିସ୍ତାନୀ ନାଗରିକମାନଙ୍କୁ ‘ଲିଭ୍ ଇଣ୍ଡିଆ’ ନୋଟିସ୍ ଜାରି କରିଥିଲେ। ସେହିପରି ପାକିସ୍ତାନରେ ଥିବା ଭାରତୀୟ ନାଗରିକଙ୍କୁ ସ୍ୱଦେଶ ଫେରି ଆସିବା ପାଇଁ କହିଥିଲେ।

ଗତ ଦୁଇ ଦିନ ମଧ୍ୟରେ ପ୍ରାୟ ୨୭୨ ଜଣ ପାକିସ୍ତାନୀ ନାଗରିକ ଅଟାରି-ୱାଘା ସୀମା ଦେଇ ଭାରତ ଛାଡିଛନ୍ତି। ୧୩ ଜଣ କୂଟନୀତିଜ୍ଞ ଓ ଅଧିକାରୀଙ୍କ ସମେତ ୬୨୯ ଜଣ ଭାରତୀୟ ପଞ୍ଜାବରେ ଥିବା ଅନ୍ତର୍ଜାତୀୟ ସୀମା ପାର ହୋଇ ପାକିସ୍ତାନରୁ ଫେରିଛନ୍ତି।

ଏପ୍ରିଲ ୨୫ ତାରିଖରେ ଅଟାରି-ୱାଘା ସୀମା ଦେଇ ୧୯୧ ଜଣ ଓ ଏପ୍ରିଲ ୨୬ ତାରିଖରେ ଆଉ ୮୧ ଜଣ ପାକିସ୍ତାନୀ ନାଗରିକ ଭାରତ ଛାଡ଼ିଥିଲେ। ସେହିପରି ଏପ୍ରିଲ ୨୫ରେ ୨୮୭ ଜଣ ଏପ୍ରିଲ ୨୬ରେ ୧୩ ଜଣ କୂଟନୀତିଜ୍ଞ ଏବଂ ଅଧିକାରୀଙ୍କ ସମେତ ସମୁଦାୟ ୩୪୨ ଜଣ ଭାରତୀୟ ଅଟାରି-ୱାଘା ସୀମା ଦେଇ ପାକିସ୍ତାନରୁ ଭାରତକୁ ଫେରିଥିଲେ।

ରବିବାର ତଥା ଏପ୍ରିଲ୍ ୨୭ ସୁଦ୍ଧା ଭିସା ଅନ ଆରାଇଭାଲ, ବିଜନେସ, ଫିଲ୍ମ, ସାମ୍ବାଦିକ, ଟ୍ରାନଜିଟ୍, କନଫରେନ୍ସ, ପର୍ବତାରୋହଣ, ଛାତ୍ର, ପର୍ଯ୍ୟଟକ ଓ ତୀର୍ଥଯାତ୍ରୀମାନଙ୍କୁ ଦେଶ ଛାଡ଼ିବାକୁ ନିର୍ଦ୍ଦେଶ ଦିଆଯାଇଥିଲା। ତେବେ ଯେଉଁମାନଙ୍କ ପାଖରେ ଦୀର୍ଘମିଆଦୀ ଓ କୂଟନୈତିକ କିମ୍ବା ସରକାରୀ ଭିସା ରହିଛି ସେମାନଙ୍କୁ ‘ଲିଭ୍ ଇଣ୍ଡିଆ’ ନୋଟିସରୁ ବାଦ୍ ଦିଆଯାଇଥିଲା। ଯେଉଁମାନଙ୍କ ପାଖରେ ମେଡିକାଲ ଭିସା ରହିଛି ସେମାନେ ଏପ୍ରିଲ ୨୯ ତାରିଖ ଭିତରେ ଭାରତ ଛାଡିବେ।

ଯେହେତୁ ଭାରତ ଓ ପାକିସ୍ତାନ ମଧ୍ୟରେ ସିଧାସଳଖ ବିମାନ ସେବା ନାହିଁ, ତେଣୁ କିଛି ପାକିସ୍ତାନୀ ନାଗରିକ ଅନ୍ୟ ଦେଶକୁ ମଧ୍ୟ ଚାଲି ଯାଇ ଥାଇପାରନ୍ତି ବୋଲି ସୂଚନା ମିଳିଛି।

ଅନ୍ୟପଟେ ସୂଚନା ମିଳିଛି ଯେ, ପାଖାପାଖି ୫୦୫୦ ପାକିସ୍ତାନୀ ନାଗରିକ ମହାରାଷ୍ଟ୍ରରେ ରହୁଛନ୍ତି ଏବଂ ସେମାନଙ୍କ ମଧ୍ୟରୁ ଅଧିକାଂଶ ଦୀର୍ଘମିଆଦୀ ଭିସାରେ ଅଛନ୍ତି। ସେମାନଙ୍କ ମଧ୍ୟରୁ ୧୦୭ ଜଣ ପାକିସ୍ତାନୀ ନାଗରିକଙ୍କ ସନ୍ଧାନ ମିଳୁନାହିଁ। ସେହିପରି ତେଲେଙ୍ଗାନାରେ ୨୦୮ ଜଣ, କେରଳରେ ୧୦୪ ଜଣ, ମଧ୍ୟପ୍ରଦେଶରେ ପ୍ରାୟ ୨୨୮ ଜଣ, ଓଡ଼ିଶାରେ ୧୨ ଜଣ ଓ ଗୋଆରେ ତିନି ଜଣ ପାକିସ୍ତାନୀ ନାଗରିକ ରହୁଥିବାର ସୂଚନା ମିଳିଛି।