ପାକିସ୍ତାନକୁ ଭାରତର ଦୃଢ ଜବାବ

ପାକ୍ ବିରୋଧରେ ନିଆଗଲା କଡା ଆକ୍ସନ

ନୂଆଦିଲ୍ଲୀ, ୨୪/୦୪: ପହଲଗାମ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ହେବା ପରେ ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ବଡ଼ ନିଷ୍ପତ୍ତି ନିଆଯାଇଛି। ସୁରକ୍ଷା ସଂକ୍ରାନ୍ତ କ୍ୟାବିନେଟ୍ କମିଟି (ସିସିଏସ୍) ଏହି ଆତଙ୍କବାଦୀ ଆକ୍ରମଣକୁ କଡ଼ା ନିନ୍ଦା କରିଛି।

ଗତ କାଲି ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ସିସିଏସ୍ ବୈଠକ ବସିଥିଲା। ଏହି ବୈଠକରେ ପାକିସ୍ତାନ ପ୍ରତି କଡ଼ା ଆଭିମୁଖ୍ୟ ଗ୍ରହଣ କରିଛି ଭାରତ।

ଭାରତ ସରକାରଙ୍କ ନିଷ୍ପତ୍ତି ଅନୁଯାୟୀ, ୧୯୬୦ ମସିହାର ସିନ୍ଧୁ ନଦୀ ଚୁକ୍ତିକୁ ତୁରନ୍ତ ରଦ୍ଦ କରାଯାଇଛି। ସେହିପରି ସମନ୍ୱିତ ଅଟାରି ୱାଘା ଚେକ୍ ପୋଷ୍ଟକୁ ତୁରନ୍ତ ବନ୍ଦ କରାଯାଇଛି। ଯେଉଁମାନେ ବୈଧ ଡକ୍ୟୁମେଣ୍ଟ ସହିତ ଭାରତ ସୀମା ଅତିକ୍ରମ କରିଛନ୍ତି ସେମାନେ ୧ ମେ ୨୦୨୫ ପୂର୍ବରୁ ସେହି ମାର୍ଗ ଦେଇ ଫେରି ଯିବାକୁ ନିର୍ଦ୍ଦେଶ ଦିଆଯାଇଛି।

ସାର୍କ ଭିସା ଛାଡ଼ ଯୋଜନା (ଏସଭିଇଏସ୍) ଭିସା ଅଧୀନରେ ପାକିସ୍ତାନୀ ନାଗରିକମାନେ ଭାରତ ଆସି ପାରିବେ ନାହିଁ। ପାକିସ୍ତାନୀ ନାଗରିକମାନଙ୍କୁ ଅତୀତରେ ଜାରି କରାଯାଇଥିବା କୌଣସି ଏସଭିଇଏସ୍ ଭିସାକୁ ବାତିଲ ବୋଲି ବିବେଚନା କରାଯିବ। ବର୍ତ୍ତମାନ ଏସଭିଇଏସ୍ ଭିସା ଅଧୀନରେ ଭାରତରେ ଥିବା ପାକିସ୍ତାନୀ ନାଗରିକଙ୍କୁ ଭାରତ ଛାଡ଼ିବାକୁ ୪୮ ଘଣ୍ଟା ସମୟ ଦିଆଯାଇଛି।

ନୂଆଦିଲ୍ଲୀସ୍ଥିତ ପାକିସ୍ତାନୀ ହାଇକମିସନରେ ପ୍ରତିରକ୍ଷା/ସାମରିକ, ନୌସେନା ଏବଂ ବାୟୁ ପରାମର୍ଶଦାତାମାନଙ୍କୁ ଭାରତ ଛାଡିବା ପାଇଁ ଏକ ସପ୍ତାହ ସମୟ ଦିଆଯାଇଛି। ୧ ସପ୍ତାହ ଭିତରେ ସେମାନେ ଦେଶ ଛାଡ଼ିବେ। ଭାରତରୁ ପାକିସ୍ତାନ ଦୂତବାସର ୩ ଉପଦେଷ୍ଟା ଦେଶ ଛାଡ଼ିବା ବେଳେ ପାକିସ୍ତାନରୁ ୩ ସେନା ଉପଦେଷ୍ଟାଙ୍କୁ ଭାରତ ପ୍ରତ୍ୟାବର୍ତ୍ତନ ପାଇଁ କୁହାଯାଇଛି।

ସେହିପରି ଦୂତାବାସ କର୍ମଚାରୀଙ୍କ ସଂଖ୍ୟା ୫୫ରୁ ୩୦କୁ କମିବ।