ପହଲଗାମ ହିରୋ ସଜାଦ

ଅସମୟରେ ସାଜିଥିଲେ ଦେବଦୂତ

ଧର୍ମଠୁ ଉପରେ ମାନବିକତା ମୁଖ୍ୟ ବାର୍ତ୍ତା

ନୂଆଦିଲ୍ଲୀ, ୨୫/୦୪: ଜମ୍ମୁ-କଶ୍ମୀରର ପହଲଗାମରେ ହୋଇଥିବା ବଡ଼ ଧରଣର ଆତଙ୍କବାଦୀ ଆକ୍ରମଣ ଆଶ୍ଚର୍ଯ୍ୟ ଓ ଆତଙ୍କ ଖେଳାଇ ଦେଇଛି। ସେହି ସମୟରେ ସେଠାରେ ଉପସ୍ଥିତ ଥିବା ପ୍ରତ୍ୟେକ ବ୍ୟକ୍ତି ନିଜ ଜୀବନ ବଞ୍ଚାଇବା ପାଇଁ ଆକୁଳ ଚିତ୍କାର କରୁଥାନ୍ତି। ନିଜ ପ୍ରିୟଜନଙ୍କୁ ବଞ୍ଚାଇବା ପାଇଁ ଭଗବାନଙ୍କ ନିକଟରେ ପ୍ରାର୍ଥନା କରୁଥାନ୍ତି। ଆତଙ୍କୀଙ୍କଠୁ ନିଜକୁ ଓ ପ୍ରିୟଜନଙ୍କୁ ବଞ୍ଚାଇବା ପାଇଁ ଯଥା ସମ୍ଭବ ଚେଷ୍ଟା କରୁଥାନ୍ତି ସେଠାରେ ଉପସ୍ଥିତ ଥିବା ପ୍ରତ୍ୟେକ ବ୍ୟକ୍ତି।

ହିନ୍ଦୁ ଓ ମୁସଲିମ; ଏହି ଧର୍ମ ପାର୍ଥକ୍ୟ ଯେ ଜୀବନ ନେଇଯିବ, ଏ କଥା କେହି କେବେ ସ୍ୱପ୍ନରେ ମଧ୍ୟ ଭାବିନଥିଲେ। ମୁସଲମାନ ନ ହେବା ବୋଧ ହୁଏ ଭୁଲ ସାବ୍ୟସ୍ତ ହୋଇଛି ସେହି ସମୟରେ ଏହି ଆକ୍ରମଣର ଶିକାର ହୋଇଥିବା ପ୍ରତ୍ୟେକ ବ୍ୟକ୍ତିଙ୍କ ମନରେ ଥରୁଟେ ଆସିଥିବ ନିଶ୍ଚୟ। ଭାବୁଥିବେ ଯେ, ଆମକୁ କୋରାନ ପଢି ଆସୁଥିଲେ ହୁଏତ ଆଜି ଜୀବନ ଟା ବଞ୍ଚି ଯାଇଥାନ୍ତା।

ହେଲେ ଏହି ଧର୍ମ ପାର୍ଥକ୍ୟକୁ ଭୁଲ ବୋଲି ପ୍ରମାଣିତ କରିଛନ୍ତି ସେଠାରେ ଥିବା ସ୍ଥାନୀୟ ବ୍ୟକ୍ତି। ପ୍ରାଣ ବିକଳରେ ଧାଉଁଥିବା ଲୋକଙ୍କୁ ସାହାଯ୍ୟ କରିବାକୁ ଆଗେଇ ଆସିଥିଲେ କାଶ୍ମୀରର କିଛି ମୁସଲମାନ ବ୍ୟକ୍ତି। ଧର୍ମ ପଛରେ ମାନବିକତା ଆଗ। ଏହି ବାର୍ତ୍ତାରେ ସବୁ ପୀଡ଼ିତଙ୍କୁ ସାହାଯ୍ୟ କରିବାକୁ ଆଗେଇ ଆସୁଥିଲେ। କେହି ପାଣି ଯାଚୁଥାନ୍ତି ତ କେହି ନିଜ କାନ୍ଧରେ ପୀଡ଼ିତଙ୍କୁ ଧରି ଯାଉଥାନ୍ତି। କାଳେ ଜୀବନଟା ବଞ୍ଚିଯିବ। ଏଇ ଆଶାରେ ସ୍ଥାନୀୟ ବ୍ୟକ୍ତିମାନେ ମଧ୍ୟ ସାହାଯ୍ୟ କରିବାକୁ ଆଗେଇ ଆସୁଥିଲେ।

ଠିକ୍ ସେହିପରି ଜଣେ ପହଲଗାମ ହିରୋ ହେଉଛନ୍ତି ସଜାଦ ଅହମ୍ମଦ ଭଟ୍ଟ। ଆତଙ୍କବାଦୀମାନେ ପର୍ଯ୍ୟଟକଙ୍କ ଉପରକୁ ଗୁଳି ଚଳାଇ ୨୬ ଜଣଙ୍କୁ ହତ୍ୟା କରିଥିବା ସେଠାରେ ଆତଙ୍କବାଦୀଙ୍କ ଗୁଳିରେ ଆହତ ହୋଇଥିବା ଜଣେ ଛୋଟ ପିଲାକୁ ନିଜ କାନ୍ଧରେ ନେଇ ଯାଉଥିବାର ଏକ ଭିଡିଓ ଭାଇରାଲ ହୋଇଛି। ଏହି ଭିଡ଼ିଓରେ ଦେଖା ଦେଇଛି ଯେ, ସଜାଦ ସେହି ପାହାଡ଼ିଆ ଅଞ୍ଚଳରୁ ତଳକୁ ପିଲାଟିକୁ ଧରି ଦୌଡୁଛନ୍ତି। ସେହି ପିଲାଟି ସମ୍ପୂର୍ଣ୍ଣ ରକ୍ତରେ ଜୁଡୁବୁଡୁ ହୋଇ ଯାଇଥାଏ।

ସମସ୍ତେ ନିଜ ନିଜ ଜୀବନ ବଞ୍ଚାଇବା ପାଇଁ ପ୍ରାଣ ବିକଳରେ ଧାଉଁଥିବା ବେଳେ ସଜାଦ ନ ଡରି ସାମନାକୁ ଆସିଥିଲେ। ଆତଙ୍କବାଦୀଙ୍କ ଆକ୍ରମଣର ଶିକାର ହେବାର ଭୟ ନଥିଲା। ବରଂ ତାଙ୍କ ମନରେ ଥିଲା ଏଠାରେ ଯେମିତି କାହାରି ଜୀବନ ନ ଯାଉ। ତେଣୁ ତାଙ୍କ ଦ୍ୱାରା ଯେତିକି ସମ୍ଭବ ହୋଇ ପାରିଥିଲା ସେ ସାହାଯ୍ୟ କରୁଥିଲେ।

ଜାତୀୟ ଗଣମାଧ୍ୟମରେ ପ୍ରତିକ୍ରିୟା ରଖିବା ବେଳେ ମଧ୍ୟ ଏତେ ସବୁ ପାଇଁ ସେ ନିଜକୁ ପ୍ରଶଂସା ନ କରି ତାଙ୍କ ସହ ଅନ୍ୟମାନେ ଯେଉଁମାନେ ସବୁ ସାହାଯ୍ୟ କରୁଥିଲେ ସେ ସେମାନଙ୍କୁ ପ୍ରଶଂସା କରୁଥିଲେ। ପ୍ରକୃତରେ ସବୁ ମୁସଲମାନ ସମାନ ନୁହଁନ୍ତି ବୋଲି ସେ ପ୍ରମାଣ କରି ଦେଖାଇ ଦେଇଛନ୍ତି।

ସେ କହିଛନ୍ତି ଯେ, ଧର୍ମ ଆଗ ନୁହେଁ। ଆଗ ହେଉଛି ମାନବିକତା। ସର୍ବପ୍ରଥମେ ମାନବିକତା ତା’ପରେ ଧର୍ମ ଆସେ। ମାନବିକତା ଠୁ ବଳି ଆଉ କିଛି ନାହିଁ। ଯଦି ଏହି ଅସମୟରେ ଆମେ ମାନବିକତା ନ ଦେଖି ଧର୍ମ ଦେଖିବା ତାହାଲେ ହୁଏତ ମଣିଷ ପଣିଆ ମରିଯିବ‌। ଏହି ଆକ୍ରମଣରେ କେବଳ ଯେଉଁମାନେ ଶିକାର ହୋଇଛନ୍ତି ସେମାନେ ନୁହେଁ, ବରଂ ସମ୍ପୂର୍ଣ୍ଣ କାଶ୍ମୀରୀବାସୀ କାନ୍ଦୁଛନ୍ତି। ପହଲଗାମର ପ୍ରତ୍ୟେକ ଗଳିକନ୍ଦିରେ ଲୋକଙ୍କ ଘରେ ହାହାକାର ସୃଷ୍ଟି ହୋଇଛି। ଯଦି ଛାତି ଚିରି ମନର କଷ୍ଟକୁ ଦେଖାଇବା ସମ୍ଭବ ହୋଇ ପାରିଥାନ୍ତା ତାହାଲେ ଆମେ ପ୍ରମାଣ କରି ଦେଇଥାନ୍ତୁ ଯେ, ଆମକୁ କେତେ କଷ୍ଟ ହେଉଛି। ଏଭଳି ବର୍ବରକାଣ୍ଡ ପହଲଗାମରେ ପ୍ରଥମ ଥର ଘଟିଛି। ଏହି ଆକ୍ରମଣରେ ସମ୍ପୃକ୍ତ ଥିବା ସବୁ ଆତଙ୍କବାଦୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯାଉ ବୋଲି କହିଛନ୍ତି।

ସେ ଆହୁରି ମଧ୍ୟ ପର୍ଯ୍ୟଟକମାନଙ୍କୁ ଅପିଲ କରି କହିଛନ୍ତି ଆପଣମାନେ ଡରନ୍ତୁନି। କାଶ୍ମୀର ବୁଲିବାକୁ ଆସନ୍ତୁ। କାଶ୍ମୀର ଉପତ୍ୟକାର ମଜା ନିଅନ୍ତୁ। ଆମେମାନେ ଅଛୁ। ଆପଣମାନଙ୍କ ସୁରକ୍ଷା ପାଇଁ ଆମେ ଅଛୁ। ନିଜେ ସାହାଯ୍ୟ କରି ମଧ୍ୟ ସବୁ ସହାନୁଭୂତି ଏବଂ ପ୍ରଶଂସା ନିଜେ ନ ନେଇ ଅନ୍ୟ ମାନଙ୍କୁ ଦେଉଥିବା ଏହି ପହଲଗାମ ହିରୋଙ୍କୁ ଏକ ସାଲ୍ୟୁଟ।