ପୁଣି ଜଣେ କିଟ୍ ଛାତ୍ରଙ୍କ ସନ୍ଦେହଜନକ ମୃତ୍ୟୁ

ମଞ୍ଚେଶ୍ୱର ଥାନାଞ୍ଚଳରୁ ମିଳିଲା ମୃତଦେହ

ହତ୍ୟା ନା ଆତ୍ମହତ୍ୟା?

ଭୁବନେଶ୍ୱର, ୦୧/୦୪: ଗତ କିଛି ଦିନର ବ୍ୟବଧାନ ପରେ ପୁଣି ଥରେ ସମାନ ପ୍ରସଙ୍ଗରେ ଚର୍ଚ୍ଚାର ପରିସରକୁ ଆସିଲା କିଟ୍ ବିଶ୍ଵବିଦ୍ୟାଳୟ। କିଟ୍ ବିଶ୍ଵବିଦ୍ୟାଳୟରେ ପୁଣି ଘଟିଛି ଅଘଟଣ। ସେଠାରେ ପାଠ ପଢ଼ୁଥିବା ଜଣେ ଛାତ୍ରଙ୍କ ସନ୍ଦେହଜନକ ମୃତ୍ୟୁ ହୋଇଛି। ମଞ୍ଚେଶ୍ୱର ଥାନା ଅଞ୍ଚଳରେ ଥିବା ଏକ ନିର୍ମାଣାଧୀନ କୋଠାରୁ ମୃତଦେହ ଉଦ୍ଧାର କରାଯାଇ ତଦନ୍ତ ଆରମ୍ଭ କରାଯାଇଛି। ମୃତ ଛାତ୍ରଙ୍କୁ ଚିହ୍ନଟ କରାଯାଇଛି।

ସେ ପଶ୍ଚିମବଙ୍ଗର ବାଙ୍କୁରା ଅଞ୍ଚଳର ଅର୍ଣ୍ଣବ ମୁଖାର୍ଜୀ ବୋଲି ଜଣାପଡ଼ିଛି। ଅର୍ଣ୍ଣବ କିଟ୍ ବିଶ୍ଵବିଦ୍ୟାଳୟରେ ବି.ଟେକ ତୃତୀୟ ବର୍ଷର ଛାତ୍ର ଥିଲେ ଏବଂ ବିଶ୍ୱବିଦ୍ୟାଳୟ ହଷ୍ଟେଲରେ ରହି ପାଠ ପଢୁଥିଲେ। ଗତ କାଲି ମଞ୍ଚେଶ୍ୱର ଥାନା ଅଞ୍ଚଳରେ ଥିବା ଏକ ୭ ମହଲା କୋଠା ତଳୁ ତାଙ୍କର କ୍ଷତବିକ୍ଷତ ମୃତଦେହ ମିଳିଥିଲା। ଉକ୍ତ କୋଠାର ସିକ୍ୟୁରିଟି ଗାର୍ଡ ଜଣକ ମୃତଦେହ ଦେଖି ପୋଲିସକୁ ଫୋନ୍ କରିଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଥିଲା। ମୃତ ଛାତ୍ରଙ୍କ ପରିବାର ଲୋକେ ଉପସ୍ଥିତ ନଥିବାରୁ ଶବ ବ୍ୟବଚ୍ଛେଦ ପ୍ରକ୍ରିୟା ଆରମ୍ଭ ହୋଇନାହିଁ। ପରିବାର ଲୋକେ ଓଡ଼ିଶାରେ ପହଞ୍ଚିବା ପରେ ହିଁ ଶବ ବ୍ୟବଚ୍ଛେଦ ପ୍ରକ୍ରିୟା ଆରମ୍ଭ ହେବ।

ଏସବୁ ମଧ୍ୟରେ ଛାତ୍ରଙ୍କ ମୃତ୍ୟୁକୁ ନେଇ କିଟ୍ ଉପରେ ବହୁ ପ୍ରଶ୍ନ ସୃଷ୍ଟି ହୋଇଛି। ବାରମ୍ବାର କିଟ୍ ବିଶ୍ଵବିଦ୍ୟାଳୟରେ ଏଭଳି ଅଘଟଣ ଘଟୁଥିବା ବିଶ୍ୱବିଦ୍ୟାଳୟରେ ସୁରକ୍ଷା ପ୍ରତି ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ମଞ୍ଚେଶ୍ୱର ଥାନାଞ୍ଚଳ ବିଶ୍ୱବିଦ୍ୟାଳୟ ଠାରୁ ବହୁ ଦୂରରେ ଥିଲେ ମଧ୍ୟ ସେ କିପରି ଓ କାହିଁକି ଏଠାକୁ ଆସିଥିଲେ ଏପର୍ଯ୍ୟନ୍ତ ଜଣା ପଡିନାହିଁ। ଏବଂ ତାଙ୍କର ମୃତ୍ୟୁ ଆତ୍ମହତ୍ୟା ଜନିତ କି ହତ୍ୟା କରାଯାଇଛି ତାହା ମଧ୍ୟ ସ୍ପଷ୍ଟ ହୋଇନାହିଁ। ଯଦିଓ ମଞ୍ଚେଶ୍ୱର ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ତେବେ ଛାତ୍ର ମୃତ୍ୟୁ ନେଇ ବିଶ୍ୱବିଦ୍ୟାଳୟ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଅନ୍ୟପଟେ କିଟ୍‌ ପକ୍ଷରୁ ମଧ୍ୟ ଛାତ୍ରଙ୍କ ନିଖୋଜ ଥିବା ଖବର ଇନଫୋସିଟି ଥାନାରେ ରୁଜୁ କରାଯାଇଛି।