ଓଡ଼ିଶା ସମେତ ୬ ରାଜ୍ୟକୁ ଯିବାକୁ ନିଜ ଦେଶର ନାଗରିକଙ୍କୁ ଯିବାକୁ ବାରଣ କଲା ଆମେରିକା

ଓଡ଼ିଶାରେ ସୁରକ୍ଷିତ ନାହାନ୍ତି ଆମେରିକୀୟ ମହିଳା?

ଓଡ଼ିଶା ସମେତ ୬ ରାଜ୍ୟକୁ ଯିବାକୁ ନିଜ ଦେଶର ନାଗରିକଙ୍କୁ ଯିବାକୁ ବାରଣ କଲା ଆମେରିକା

ଭାରତର ଏହି ୬ ରାଜ୍ୟକୁ ନ ଯିବାକୁ ଆଡଭାଇଜରି ଜାରି କଲା ଆମେରିକା

ନୂଆଦିଲ୍ଲୀ, ୨୨/୦୬: ଓଡ଼ିଶା ସମେତ ଭାରତର ୬ ରାଜ୍ୟରେ ସୁରକ୍ଷିତ ନାହାନ୍ତି ଆମେରିକୀୟ। ଭାରତରେ ଦିନକୁ ଦିନ ବୃଦ୍ଧି ପାଉଛି ଦୁଷ୍କର୍ମ, ହିଂସାକାଣ୍ଡ ଓ ଆତଙ୍କବାଦ କାର୍ଯ୍ୟକଳାପ। ବିଶେଷ କରି ୬ ରାଜ୍ୟରେ ସୁରକ୍ଷିତ ନାହାନ୍ତି ମହିଳା। ତେଣୁ ଆମେରିକୀୟ ମହିଳା ନାଗରିକଙ୍କୁ ଭାରତ ଭ୍ରମଣ କରିବାକୁ ଆସିଲେ ୬ ରାଜ୍ୟକୁ ନ ଯିବାକୁ ପରାମର୍ଶ ଦେଇଛି ଦେଶର ବୈଦେଶିକ ମନ୍ତ୍ରାଳୟ।

ଏ ନେଇ ଆମେରିକାର ବୈଦେଶିକ ମନ୍ତ୍ରାଳୟ ପକ୍ଷରୁ ଲେବଲ-୨ ଚେତାବନୀ ଜାରି କରାଯାଇଛି। ଗତ ଜୁନ ୧୬ରେ ଏହି ନିର୍ଦ୍ଦେଶାବଳୀ ଜାରି କରାଯାଇଥିଲା।

ନିର୍ଦ୍ଦେଶାବଳୀ ମୁତାବକ, ଭାରତର କିଛି ଅଞ୍ଚଳରେ ଦିନକୁ ଦିନ ବିପଦ ବୃଦ୍ଧି ପାଉଛି। ବିଶେଷତଃ ଦୁଷ୍କର୍ମ ଘଟଣା ବେଶୀ ବଢୁଛି। ଦେଶର ବିଭିନ୍ନ ପର୍ଯ୍ୟଟନ ସ୍ଥଳୀ ଓ ଅନ୍ୟାନ୍ୟ ଅଞ୍ଚଳରେ ଯୌନ ନିର୍ଯାତନା ବଢ଼ୁଛି। ବିନା ଆଲର୍ଟରେ ଆତଙ୍କବାଦୀମାନେ ଆକ୍ରମଣ କରୁଛନ୍ତି। ସେମାନେ ପର୍ଯ୍ୟଟନ ସ୍ଥଳୀ, ପରିବହନ କେନ୍ଦ୍ର, ମାର୍କେଟ, ସପିଂ ମଲ୍ କୁ ଟାର୍ଗେଟ କରୁଛନ୍ତି। ତେଣୁ ଭାରତର ଗ୍ରାମାଞ୍ଚଳରେ ଥିବା ଆମେରିକୀୟ ନାଗରିକମାନଙ୍କ ପାଇଁ ଜରୁରୀକାଳୀନ ସେବା ଜାରି କରାଯାଇଛି। ତେଣୁ ଭାରତର ୬ ରାଜ୍ୟର ଗ୍ରାମାଞ୍ଚଳକୁ ଯିବାକୁ ହେଲେ ସ୍ୱତନ୍ତ୍ର ଅନୁମତି ନେବାକୁ ଆଡଭାଇଜରିରେ କୁହାଯାଇଛି।

ଆଡଭାଇଜରିରେ ଆହୁରି ମଧ୍ୟ କୁହାଯାଇଛି ଯେ, ଭାରତରେ ସାଟେଲାଇଟ ଫୋନ ଜିପିଏସ ଡିଭାଇସ୍ ବେଆଇନ ଥିବାରୁ ସେଠାରେ ଏହି ସବୁ ଜିନିଷ ବ୍ୟବହାର କଲେ ୨୦୦ ଡଲାର ଜୋରିମାନା କିମ୍ବା ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶ ରହିଛି। ତେଣୁ ମହିଳାମାନେ ଏକୁଟିଆ ଭାରତରେ ଭ୍ରମଣ କରନ୍ତୁ ନାହିଁ।

ଜମ୍ମୁୁ- କାଶ୍ମୀର, ଭାରତ-ପାକିସ୍ତାନ ସୀମା, କେନ୍ଦ୍ରୀୟ ଓ ପୂର୍ବ ଭାରତରେ ରାଜଧାନୀ ବ୍ୟତୀତ ସ୍ୱତନ୍ତ୍ର ଅନୁମତି ବିନା ଗ୍ରାମାଞ୍ଚଳକୁ ଯାଆନ୍ତୁ ନାହିଁ।

ସେହିପରି ଭାରତ-ନେପାଳ ସୀମା ପାର ନ କରିବା ପାଇଁ ପରାମର୍ଶ ଦିଆଯାଇଛି। ଭାରତ-ନେପାଳ ସୀମା ଡେଇଁଲେ ସେଠାରେ ଅଟକ ରହିଯିବା ଏବଂ ଜୋରିମାନା ଦେବାର ସମ୍ଭାବନା ରହିଛି। ଏତଦବ୍ୟତୀତ ଉତ୍ତର-ପୂର୍ବ ଦେଶ ଯେପରିକି ମଣିପୁର ମଧ୍ୟ ଯିବାକୁ ମନା କରାଯାଇଛି।

ଭାରତର ନିମ୍ନୋକ୍ତ ୬ ରାଜ୍ୟକୁ ଯିବାକୁ ଭ୍ରମଣ ଚେତାବନୀ ଜାରି କରିଛି ଆମେରିକାର ବୈଦେଶିକ ମନ୍ତ୍ରାଳୟ:-

୧. ବିହାର

୨. ଝାଡ଼ଖଣ୍ଡ

୩. ଛତିଶଗଡ଼

୪. ପଶ୍ଚିମବଙ୍ଗ

୫. ମେଘାଳୟ

୬. ଓଡ଼ିଶା