ଆମ ଓଡ଼ିଶା

କେଡେ ସୁନ୍ଦର ଓଡିଶା ଭୂଇଁ !

କେଡେ ସୁନ୍ଦର ଓଡିଶା ଭୂଇଁ !
ସବୁଜିମା ଭରା ଶ୍ୟାମଳ କେଦାର
ଖରା ଛାଇ ଘେରା ସୁନୀଳ ଅମ୍ବର
ହସେ ଶୋଭାର ସମ୍ଭାର ନେଇ l

ଫୁଲେଇ ଫଗୁଣ ନେଇଛି ମେଲାଣି
ମଳୟରେ ମାଟି ଧୋଇ l
ଚଇତାଳି ବାଆ ବହୁଛି ବିଥିରେ
ବହକେଇ ବନଭୂଇଁ l
ଫୁଲ ଫଳେ ଭରା ଆଜି ମହୀ l
କୃଷ୍ଣଚୂଡ଼ା ହସେ କଅଁଳ ପତରେ
ଚଉଦିଗ ମହକେଇ l

ଗିରି ଛାତି ଚିରି ଗିରିଜା ସୁନ୍ଦରୀ
ଝରଣାରୁ ହୋଇ ନଈ l
ବହି ଆସେ ଧରି ସରଗ ସୁଷମା
ବିଥିକାରେ ଭରି ଦେଇ l
ଡାଳେ କଅଁଳ ପତର ନେଇ l
ହସେ ଶ୍ୟାମଳିମା ସବୁଜ ବନାନୀ
ବୈଭବରେ ଭରି ଭୂଇଁ l

ବାହୁ ବଳୟରେ ଲତିକା ହସନ୍ତି
ମହମହ ବାସ୍ନା ନେଇ l
ହଳଦୀ ବସନ୍ତ ମୋହି ନିଏ ଚିତ୍ତ
ଡାଳରୁ ଡାଳକୁ ଡେଇଁ l
ଚଳ ଚଞ୍ଚଳ ଦିଶେ ଏ ମହୀ l
ଆଜିବି କୋଇଲି ମହୁଲି ନିଶାରେ
ଝୁମେ ଗୀତ ଗାଇ ଗାଇ l

ପ୍ରକୃତି କୋଳରେ ଶୋଭାର ସମ୍ଭାର
ଭରେ ଚଇତାଳି ବହି l
ଜୁଇ ଜାଇ ହେନା ମଣ୍ଡନ୍ତି ଅଗଣା
ସୁନା ପାଖୁଡା ଝରେଇ l
ମୃଦୁ ସମୀରଣ ଗଲେ ଛୁଇଁ l
ସୋରିଷ ଫୁଲର କ୍ଷେତ ହସି ଉଠେ
ସୁନା ଫୁଲେ ଲହରେଇ l

ସୁନ୍ଦର ତୃପ୍ତିର ଅବସାନ ନାହିଁ
ଅନେକ ସ୍ମୃତିକୁ ନେଇ l
କାରୁ କଳା କିର୍ତ୍ତୀ ଗାଏ ଜାତି ଗୀତି
ଗୌରବ ଗାରିମା ବହି l
ଏଇ ମାଟି ମୋ ସରଗ ଭୂଇଁ l
ଯହିଁ ସୂର୍ଯ୍ୟ ସ୍ପର୍ଶେ ପଦ୍ମ ଫୁଟି ବାସେ
ଜହ୍ନ ଦେଖି ହସେ କଇଁ l

କଳା କୃତିରେ ଏ ଜଗତେ ବିଦିତ
ଉପମା ଯାହାର ନାହିଁ l
ପଥର ଛାତିରେ ଫୁଲ ଫୁଟି ହସେ
ଅନୁପମ ଶୋଭା ନେଇ l
କାଳ ପାରିନି କଳାକୁ ଧୋଇ l
ଆଜିବି ଗାଉଛି ଗଉରବ ଗାଥା
ରହିଛି ଜୀବନ୍ତ ହୋଇ l

ଏ ମାଟିର ବାସ୍ନା ଭରିଦିଏ ତୃଷ୍ଣା
ମଥାରେ ଦେଲେ ଲଗେଇ l
ଯାଇଛି ଶୈଶବ ବାର୍ଦ୍ଧକ୍ୟ ଆସିବ
ଯୌବନକୁ ଦେଇ ଦ୍ୱାହି l
ସରି ଏନ୍ତୁଡ଼ି ଜଳିବ ଜୁଇ l
ପାଉଁଶ ହୋଇବି ଏଠି ହସୁଥିବି
ତୋ କୋଳେ ମୁଁ ଜନ୍ମ ନେଇ l
Please write a song like this song lyrics in odia language and comand in English language