ଆସୁଛି ଘୂର୍ଣ୍ଣିବଳୟ, ପ୍ରଭାବରେ ଓଡ଼ିଶାର ଅଧିକାଂଶ ଜିଲ୍ଲାରେ ହେବ ପ୍ରବଳ ବର୍ଷା ସହ ୪୦ କିଲୋମିଟର ବେଗରେ ବହିବ ପବନ

ଆସୁଛି ଘୂର୍ଣ୍ଣିବଳୟ, ପ୍ରଭାବରେ ଓଡ଼ିଶାର ଅଧିକାଂଶ ଜିଲ୍ଲାରେ ହେବ ପ୍ରବଳ ବର୍ଷା ସହ ୪୦ କିଲୋମିଟର ବେଗରେ ବହିବ ପବନ

ରାଜ୍ୟର ବିଭିନ୍ନ ଜିଲ୍ଲାରେ ଜାରି ରହିଛି ବର୍ଷା। ବିଜୁଳି ଘଡ଼ଘଡି଼ ସାଙ୍ଗକୁ ପ୍ରବଳ ବର୍ଷା ନେଇ ଆଜି ଆଉ କିଛି ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ ବିଭାଗ। ତେବେ, ଆସନ୍ତୁ ଜାଣିବା ଆଜି କେଉଁ ସବୁ ଜିଲ୍ଲାରେ ପ୍ରବଳ ବର୍ଷା ନେଇ ସମ୍ଭାବନା ରହିଛି।

 

ଉତ୍ତର ବଙ୍ଗୋପସାଗର ଓ ସଂଲଗ୍ନ ଅଞ୍ଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି। ୯ ତାରିଖ ଯାଏଁ ଏହା ସକ୍ରିୟ ରହିବ।  

 

ଆଜି  କେନ୍ଦ୍ରୀୟ ପଶ୍ଚିମ ବଙ୍ଗୋପସାଗର  ଓ ଆନ୍ଧ୍ର ଉପକୂଳ ଠାରୁ  ଦୂରରେ ଆଉ ଏକ ଘୂର୍ଣ୍ଣିବଳୟ  ସୃଷ୍ଟି ହୋଇପାରେ।

 

୧୦ ତାରିଖ ବେଳକୁ ୨ ଟି ଯାକ ଘୃର୍ଣ୍ଣିବଳୟ ମିଶି ବିସ୍ତୁତ ଅଞ୍ଚଳରେ ଏକ ଘୂର୍ଣ୍ଣିବଳୟ ସୃଷ୍ଟି ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। 

 

ଆଜି ଓ ଆସନ୍ତାକାଲି ରାଜ୍ୟର ବିଭିନ୍ନ ସ୍ଥାନରେ ବର୍ଷା ହେବ ବୋଲି ଆକଳନ କରିଛି ଆଞ୍ଚଳିକ ପାଣିପାଗ ବିଭାଗ। 

 

ଏହି ୨ ଦିନ ମଧ୍ୟରେ ରାଜ୍ୟର ହାରାହାରି ୧୫ ମିମି ପର୍ଯ୍ୟନ୍ତ ବର୍ଷା ହୋଇପାରେ। ଏବଂ ସ୍ଥାନେ ସ୍ଥାନେ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି। 

 

ଏହା ପର  ଦୁଇ ଦିନ  ଅର୍ଥାତ୍ ୧୦ ଓ  ୧୧ ତାରିଖରେ ଦକ୍ଷିଣ ଉପକୂଳ ଓ ସଂଲଗ୍ନ ଅଞ୍ଚଳରେ  ସ୍ବଳ୍ପ ବର୍ଷା( ୧୫ ମିମି ପର୍ଯ୍ୟନ୍ତ) ବର୍ଷା ହୋଇପାରେ। 

 

୧୨ ଓ ୧୩ ତାରିଖରେ ଖୋର୍ଦ୍ଧା, ପୁରୀ, ଗଞ୍ଜାମ, ଗଜପତି ସମେତ ସମୁଦ୍ର ସଂଲଗ୍ନ ଅଞ୍ଚଳରେ  ସ୍ବଳ୍ପ ବର୍ଷା ହେବାର ସମ୍ଭାବନା ରହିଛି।  

 

ଆଜି ଠାରୁ ୧୧ ତାରିଖ ମଧ୍ୟରେ ରାଜ୍ୟରେ ପ୍ରବଳ ବର୍ଷା ସହ ବିଜୁଳି ଘଡ଼ଘଡ଼ି ହେବାର  ସମ୍ଭାବନା ରହିଛି।  

 

ଆଜି ବିଶେଷକରି, ବରଗଡ଼ , ସମ୍ବଲପୁର, ଝାରସୁଗୁଡା, ସୁନ୍ଦରଗଡ଼, ଦେବଗଡ, କେନ୍ଦୁଝର, ଅନୁଗୁଳ, ଯାଜପୁର, ଭଦ୍ରକ, ବାଲେଶ୍ବର, କେନ୍ଦ୍ରାପଡା, ଜଗତସିଂହପୁର,ପୁରୀ, ଖୋର୍ଦ୍ଧା, ଗଞ୍ଜାମ, ଗଜପତି, ନୟାଗଡ, କଟକ ଓ ମୟୂରଭଞ୍ଜ ଜିଲ୍ଲାକୁ ପ୍ରବଳ ବର୍ଷା ନେଇ ୟେଲୋ ଆଲର୍ଟ ଜାରି କରାଯାଇଛି।

 

ଏହାସହ ବିଜୁଳି ଘଡ଼ଘଡ଼ି ସହ ୩୦ ରୁ ୪୦ କିମି ବେଗରେ ପବନ ପହିବା ନେଇ ସତର୍କତା ଜାରି କରାଯାଇଛି। 

 

ସେହିପରି, ଆସନ୍ତାକାଲି, କେନ୍ଦୁଝର, ମୟୂରଭଂଜ, ବାଲେଶ୍ବର,ଭଦ୍ରକ,ଯାଜପୁର,କଟକ, ଖୋର୍ଦ୍ଧା, ପୁରୀ, ନୟାଗଡ଼, ଗଞ୍ଜାମ,ଗଜପତି, କେନ୍ଦ୍ରାପଡା ଓ ଜଗତସିଂହପୁରକୁ ୟେଲୋ ଆଲର୍ଟ ଜାରି କରାଯାଇଛି। 

 ଆସୁଛି ଘୂର୍ଣ୍ଣିବଳୟ, ପ୍ରଭାବରେ ଏହିସବୁ ଜିଲ୍ଲାରେ ହେବ ପ୍ରବଳ ବର୍ଷା ସହ ୪୦ କିମି ବେଗରେ ବହିବ ପବନ

ନୂଆପଡ଼ା ଉପନିର୍ବାଚନ: ସାମାଜିକ ଗଣମାଧ୍ୟମରେ କଂଗ୍ରେସର ପ୍ରାର୍ଥୀ ଘୋଷଣା !

ଭୁବନେଶ୍ବର: ନୂଆପଡ଼ା ବିଧାନସଭା ଉପନିର୍ବାଚନ ପାଇଁ ତାରିଖ ଘୋଷଣା ସରିଛି। ରାଜ୍ୟର ୩ ପ୍ରମୁଖ ରାଜନୈତିକ ଦଳ ବିଜେପି, ବିଜେଡି ଓ କଂଗ୍ରେସ ପକ୍ଷରୁ ଉପନିର୍ବାଚନ ପାଇଁ କସରତ ଆରମ୍ଭ ହୋଇଯାଇଛି। ଏହାରି ଭିତରେ କଂଗ୍ରେସରେ ଏକ ବ୍ୟତିକ୍ରମ ଦେଖିବାକୁ ମିଳିଛି। ସାମାଜିକ ଗଣମାଧ୍ୟମରେ ଘାସିରାମ ମାଝୀଙ୍କୁ ଦଳ ନୂଆପଡ଼ା ପ୍ରାର୍ଥୀ ଭାବେ ଦର୍ଶାଇଛି। କଂଗ୍ରେସର ଅଫିସିଆଲ ‘ଏକ୍ସ’ ହ୍ୟାଣ୍ଡେଲ୍‌ରୁ ଏପରି ପୋଷ୍ଟକୁ ନେଇ ଦ୍ବନ୍ଦ୍ବ ଦେଖାଦେଇଛି।

ଏହି ପୋଷ୍ଟରେ ଉଲ୍ଲେଖ ଅଛି ଯେ, ‘ନୂଆପଡ଼ା ନ୍ୟାୟ ସମାବେଶ’ ସଫଳ ରୂପେ ଅନୁଷ୍ଠିତ ହୋଇଯାଇଛି। ପିସିସି ସଭାପତି ଭକ୍ତ ଚରଣ ଦାସଙ୍କ ସମେତ ନୂଆପଡ଼ା ପ୍ରାର୍ଥୀ ଘାସିରାମ ମାଝୀ ଏବଂ ଅନ୍ୟ ବରିଷ୍ଠ ନେତୃବୃନ୍ଦ ଉପସ୍ଥିତ ରହି ଆଗାମୀ ଉପନିର୍ବାଚନରେ କଂଗ୍ରେସ କିପରି ବିଜୟ ଲାଭ କରିବ ଏବଂ ନୂଆପଡ଼ାରେ ନ୍ୟାୟ ସ୍ଥାପନା ପାଇଁ ନୂଆପଡ଼ାବାସୀଙ୍କ ଆଶୀର୍ବାଦ କାମନା କରିଛନ୍ତି। କେବଳ ଏହି ପୋଷ୍ଟ ନୁହେଁ ପିସିସି ପକ୍ଷରୁ ଗଣମାଧ୍ୟମକୁ ଦିଆଯାଇଥିବା ପ୍ରେସ୍‌ ବିଜ୍ଞପ୍ତିରେ ବି ଘାସିରାମ ନୂଆପଡ଼ା ବିଧାୟକ ପ୍ରାର୍ଥୀ ବୋଲି ଉଲ୍ଲେଖ କରାଯାଇଛି।

ବିଧିବଦ୍ଧ ଭାବେ ଦଳ ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା ପୂର୍ବରୁ ସାମାଜିକ ଗଣମାଧ୍ୟମରେ ପ୍ରାର୍ଥୀ ଭାବେ କାହା ନାଁ ଲେଖାଯାଇ ନ ଥାଏ। କଂଗ୍ରେସ ଏକ ଜାତୀୟ ଦଳ ହୋଇଥିବାବେଳେ ନିଷ୍ପତ୍ତି ହାଇକମାଣ୍ଡଙ୍କ ହାତରେ ଥାଏ। ରାଜ୍ୟରୁ ନାଁ ପଠାଗଲେ ବି ଶୀର୍ଷ ନେତୃତ୍ବ ମୋହର ମାରିଥାନ୍ତି। ତିନୋଟି ପର୍ଯ୍ୟାୟରେ ପ୍ରାର୍ଥୀ ମନୋନୟନ ହୋଇଥାଏ। ପ୍ରଦେଶ ଇଲେକ୍ସନ କମିଟି, ସ୍କ୍ରିନିଂ କମିଟି ଏବଂ ସେଣ୍ଟ୍ରାଲ ଇଲେକ୍ସନ କମିଟି ଆଦିର ଭୂମିକା ପ୍ରାର୍ଥୀ ମନୋନୟନରେ ଗୁରୁତ୍ବପୂର୍ଣ୍ଣ। ବିଧିବଦ୍ଧ ପ୍ରକ୍ରିୟା ଅବଲମ୍ବନ ନ କରି ଘାସିରାମଙ୍କୁ ଆଗୁଆ ଦଳର ପ୍ରାର୍ଥୀ ଘୋଷଣା କରି ରାଜ୍ୟ କଂଗ୍ରେସ କି ବାର୍ତ୍ତା ଦେବାକୁ ଚାହୁଁଛି ବୋଲି ସାଧାରଣରେ ପ୍ରଶ୍ନ ଉଠିଛି।

ଉଲ୍ଲେଖନୀୟ ଯେ, ଘାସିରାମ କଂଗ୍ରେସର ନୂଆପଡ଼ା ଜିଲା ସଭାପତି ଭାବେ ନିକଟରେ ନିଯୁକ୍ତ ହୋଇଛନ୍ତି। ସେ ଚଳିତ ଉପନିର୍ବାଚନରେ କଂଗ୍ରେସରୁ ପ୍ରାର୍ଥୀ ହେବା ଏକପ୍ରକାର ସ୍ପଷ୍ଟ ବୋଲି ଦଳୀୟ ମହଲରେ ମଧ୍ୟ ଆଲୋଚନା ହେଉଛି। ତଥାପି ବିଧିବଦ୍ଧ ଘୋଷଣାକୁ ଅପେକ୍ଷା ନ କରି ରାଜ୍ୟ କଂଗ୍ରେସ କାହିଁକି ସାମାଜିକ ଗଣମାଧ୍ୟମରେ ପ୍ରାର୍ଥୀଙ୍କ ନାମ ପ୍ରକାଶ କଲା; ତାହା ଚର୍ଚ୍ଚାର ବିଷୟ ହୋଇଛି। ଏହା ଭୁଲବଶତଃ ହୋଇଛି ନା ଜାଣିଶୁଣି ଏପରି କରାଯାଇଛି; ସେନେଇ ଦ୍ବନ୍ଦ୍ବ ସୃଷ୍ଟି ହୋଇଛି। ସୂଚନାଥାଉକି, ୨୦୨୪ରେ ଘାସିରାମ ସ୍ବାଧୀନ ଭାବେ ନିର୍ବାଚନ ଲଢ଼ି ଦ୍ବିତୀୟ ସ୍ଥାନରେ ରହିଥିଲେ। ସେ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କଠାରୁ ୧୦, ୮୮୧ ଖଣ୍ଡ ଭୋଟ୍‌ରେ ପରାଜିତ ହୋଇଥିଲେ। କଂଗ୍ରେସ ପ୍ରାର୍ଥୀ ଶରତ ପଟ୍ଟନାୟକ ମାତ୍ର ୧୫, ୫୦୧ ଖଣ୍ଡ ଭୋଟ୍‌ ପାଇ ଚତୁର୍ଥ ସ୍ଥାନରେ ରହିଥିଲେ। ଏଥର ଘାସିରାମଙ୍କୁ ପ୍ରାର୍ଥୀ କରି ବିଜେପି ଓ ବିଜେଡିକୁ ଟକ୍କର ଦେବାକୁ ଯୋଜନା ରଖିଛି କଂଗ୍ରେସ।